പൂച്ചാക്കല്‍: തൈക്കാട്ടുശേരി ബ്ലോക്ക് പ്രദേശത്ത് ജലാശയങ്ങള്‍ ക്ലോറിനേറ്റ് ചെയ്യുന്ന ജോലികള്‍ ആരോഗ്യ- പഞ്ചായത്ത് വകുപ്പ് അധികൃതരുടെ നേതൃത്വത്തില്‍ തുടങ്ങി. പൊതുകിണറുകള്‍, സ്‌കൂളുകളുടെയും സ്ഥാപനങ്ങളുടെയും കിണറുകള്‍, വീടുകളിലെ ജലാശയങ്ങള്‍ തുടങ്ങിയവയാണ് ക്ലോറിനേറ്റ് ചെയ്യുന്നത്. അതത് വാര്‍ഡ് സാനിട്ടേഷന്‍ സമിതികളെ ഏകോപിപ്പിച്ചാണ് പ്രവര്‍ത്തനങ്ങള്‍ നടത്തുന്നത്.
തീരമേഖലകളിലും വെള്ളക്കെട്ട് ഉണ്ടായിരുന്ന മേഖലകളിലും തോടുകളിലും ബ്ലീച്ചിങ് പൗഡറുകള്‍ വിതറിയും ശുചീകരിക്കുന്നുണ്ട്. ഈ സമയത്ത് നാട്ടിലുണ്ടാകുന്ന പനികളെല്ലാം ആരോഗ്യ പ്രവര്‍ത്തകരുടെ നേതൃത്വത്തില്‍ പ്രത്യേകമായി നിരീക്ഷിക്കാനും തുടങ്ങിയിട്ടുണ്ട്. വെള്ളപ്പൊക്കം കാരണം എലിപ്പനി ഭീഷണിയുളളതിനാലാണ് ഓരോ രോഗിയേയും പ്രത്യേകം നിരീക്ഷിക്കുന്നത്. ചിക്കന്‍പോക്‌സിനും സാധ്യതകളുണ്ട്. സര്‍ക്കാര്‍ ആശുപത്രികളുടേതിന് പുറമെ സ്വകാര്യ ആശുപത്രികളില്‍ പനി ബാധിച്ചെത്തുന്നവരുടെ വിവരങ്ങളും ശേഖരിച്ച് പരിശോധിക്കുന്നുണ്ട.്