ആലപ്പുഴ: കാറില്‍ പരിധിയിലധികം മദ്യം കൊണ്ടുപോയതിന് പിടിയിലായ എറണാകുളം സ്‌പെഷല്‍ സ്‌ക്വാഡ് എക്‌സൈസ് സി.ഐ ബി.എല്‍ ഷിബുവിനെ സര്‍വിസില്‍ നിന്ന് സസ്‌പെന്‍ഡ് ചെയ്തു.തിരുവനന്തപുരം പേരൂര്‍ക്കട സ്വദേശിയാണ്. എറണാകുളം എക്‌സൈസ് ഡെപ്യൂട്ടി കമ്മിഷണര്‍ നല്‍കിയ റിപ്പോര്‍ട്ടിന്റെ അടിസ്ഥാനത്തിലാണ് നടപടി.
അതിനിടെ ഷിബുവിന്റെ കാറില്‍ മദ്യം കൊണ്ടുവച്ചതെന്ന് കരുതുന്ന എറണാകുളത്തെ എക്‌സൈസ് സി.ഐ ടെനിമോനെ ചേര്‍ത്തല സി.ഐ വിളിച്ചുവരുത്തി മൊഴിയെടുത്തു. വാഹനത്തില്‍ മദ്യക്കുപ്പികള്‍ വച്ച ഉദ്യോഗസ്ഥന്റേതുള്‍പ്പെടെ ഓഫിസിലെ മുഴുവന്‍ ജീവനക്കാരുടെയും ഫോണ്‍ വിളികള്‍ പൊലിസ് സൈബര്‍ സെല്ലില്‍ പരിശോധനയ്ക്ക് അയച്ചിട്ടുണ്ട്.
മികച്ച പ്രവര്‍ത്തനത്തിന് 2010ല്‍ മുഖ്യമന്ത്രിയുടെ അവാര്‍ഡും നിരവധി ഗുഡ് സര്‍വിസ് എന്‍ട്രികളും ലഭിച്ച ഉദ്യോഗസ്ഥനാണ് ഷിബു. എക്‌സൈസ് ഉദ്യോഗസ്ഥനെ കുടുക്കിയതാണെന്ന് ആരോപണമുയര്‍ന്നതിനെ തുടര്‍ന്ന് വിജിലന്‍സും എക്‌സൈസും അന്വേഷണം നടത്തുന്നുണ്ട്. തിരുവനന്തപുരത്തെ വീട്ടിലേക്ക് മടങ്ങുകയായിരുന്ന ഷിബുവിനെ ആറേമുക്കാല്‍ ലിറ്റര്‍ മദ്യവുമായി വാഹന പരിശോധനയ്ക്കിടെ ചേര്‍ത്തല പൊലിസാണ് പിടികൂടിയത്. സി.ഐ കാറില്‍ സ്പിരിറ്റുമായി വരുന്നുവെന്ന് നാര്‍ക്കോട്ടിക് സെല്ലിന് വിവരം ലഭിച്ചിരുന്നു. മദ്യം കവറില്‍ ഡ്രൈവറുടെ പിന്‍ സീറ്റില്‍ വച്ചിരിക്കുകയായിരുന്നു.