തിരുവനന്തപുരം: എ.പി.ജെ അബ്ദുല്‍ കലാം സാങ്കേതിക ശാസ്ത്ര സര്‍വകലാശാലയുടെ ബി.ടെക് പരീക്ഷാഫലം പ്രസിദ്ധീകരിച്ചു. 

2016 ഓഗസ്റ്റില്‍ ക്ലാസുകള്‍ ആരംഭിച്ച ബി.ടെക് രണ്ടാം ബാച്ചിന്റെ അവസാന സെമസ്റ്റര്‍ പരീക്ഷകള്‍ കഴിഞ്ഞ ഓഗസ്റ്റ് 20 നാണ് പൂര്‍ത്തീകരിച്ചത്. 

പരീക്ഷയെഴുതിയ 34416 വിദ്യാര്‍ഥികളില്‍ 16017 വിദ്യാര്‍ഥികള്‍ വിജയിച്ചു; വിജയശതമാനം 46.53. 

പ്രധാന ബ്രാഞ്ചുകളില്‍ കംപ്യൂട്ടര്‍ സയന്‍സിലാണ് ഏറ്റവും ഉയര്‍ന്ന വിജയശതമാനം- 52.64. പ്രധാന ശാഖകളായ ഇലക്ട്രോണിക്‌സ്, ഇലക്ട്രിക്കല്‍, സിവില്‍, മെക്കാനിക്കല്‍ വിഭാഗങ്ങളില്‍ യഥാക്രമം 50, 49, 47, 38 ആണ് വിജയശതമാനം.

പെണ്‍കുട്ടികളാണ് വിജയശതമാനത്തില്‍ മുന്‍പില്‍. 13694 പേരില്‍ 8515 പേരും വിജയിച്ചു (62.18 ശതമാനം). പരീക്ഷയെഴുതിയ 20722 ആണ്‍കുട്ടികളുടെ വിജയശതമാനം- 36.2. 

തിരുവനന്തപുരം ഗവണ്‍മെന്റ് എന്‍ജിനീയറിങ് കോളജിലെ മെക്കാനിക്കല്‍ വിദ്യാര്‍ഥി അഖില്‍ പി മോഹന്‍, കോതമംഗലം എം.എ കോളജ് മെക്കാനിക്കല്‍ വിദ്യാര്‍ഥി അലക്‌സാണ്ടര്‍ ജോസഫ് വി. പോള്‍, കൊല്ലം ടി.കെ.എം എന്‍ജിനീയറിംഗ് കോളജിലെ സിവില്‍ വിദ്യാര്‍ഥിനി ആയിഷ എസ്. അഹമ്മദ് എന്നിവര്‍ക്കാണ് ഏറ്റവും ഉയര്‍ന്ന ഗ്രേഡുകള്‍ ലഭിച്ചത്.