കാഞ്ഞങ്ങാട്: വന്‍ സ്‌ഫോടക വസ്തുക്കള്‍ പിടികൂടിയ കോടോം-ബേളൂര്‍ പഞ്ചായത്തിലെ കോളിയാറിലെ അനധികൃത കരിങ്കല്‍ ക്വാറി പ്രവര്‍ത്തിച്ചിരുന്നത് ഭൂരഹിതര്‍ക്ക് ലഭിച്ച മിച്ച ഭൂമിയിലാണെന്ന് കണ്ടെത്തി. ഡി.വൈ.എഫ്.ഐ ജില്ലാ കമ്മിറ്റി അംഗമായിരുന്ന പ്രാദേശിക സി.പി.എം നേതാവിനും സഹോദരിക്കും പതിച്ചു കിട്ടിയ മിച്ച ഭൂമി ബിനാമി പേരില്‍ നിലവിലെ ഉടമ കോളിയാറിലെ ബെന്നിക്ക് കൈമാറുകയായിരുന്നു. ഈ ഭൂമി ഉള്‍പ്പെടെ പട്ടയം ലഭിക്കാത്തത് അടക്കം അഞ്ചര ഏക്കര്‍ സ്ഥലത്താണ് ക്വാറി പ്രവര്‍ത്തിക്കുന്നതെന്ന് ബെന്നി ക്വാറിക്ക് ലൈസന്‍സ് ലഭിക്കാനായി നല്‍കിയ രേഖകളില്‍ വ്യക്തമാണ്.
സി.പി.എം നേതാവ് പഞ്ചായത്ത് മെമ്പറായിരിക്കെ നടത്തിയ അഴിമതിയിലൂടെ ഉണ്ടാക്കിയ വന്‍ തുക ഉപയോഗിച്ചാണ് ക്വാറിയുടെ പ്രാരംഭ പ്രവര്‍ത്തനങ്ങള്‍ തുടങ്ങിയതെന്നും ആരോപണമുണ്ട്.
15 വര്‍ഷമായി യാതൊരു രേഖകളുമില്ലാതെ പരിസ്ഥിതി ആഘാതമുണ്ടാക്കി വന്‍ സ്‌ഫോടനം നടത്തി ക്വാറി പ്രവര്‍ത്തിക്കുമ്പോഴും ജിയോളജി വകുപ്പോ, പഞ്ചായത്ത്, റവന്യൂ അധികൃതരോ യാതൊരുവിധ നടപടികളും കൈകൊണ്ടിരിക്കുന്നില്ല. നാട്ടുകാര്‍ ജില്ലാ കലക്ടര്‍ക്ക് ഉള്‍പ്പെടെ പരാതി നല്‍കിയിരുന്നുവെങ്കിലും നടപടിയുണ്ടായില്ല. ഒടുവില്‍ കാഞ്ഞങ്ങാട് ആര്‍.ഡി.ഒ. സി. ബിജുവിന് ലഭിച്ച പരാതിയാണ് അനധികൃത ക്വാറിക്ക് മേല്‍ പിടിവീഴാന്‍ കാരണമായത്.