ബേക്കല്‍: പൊലിസിനെ കണ്ടപ്പോള്‍ പൈപ്പിനകത്തുതിരുകിയ കഞ്ചാവ് പാക്കറ്റുകള്‍ പിടിച്ചെടുത്തു. കഞ്ചാവ് പൈപ്പിനകത്ത് തിരുകി വച്ച ബൈക്ക് യാത്രക്കാര്‍ക്കു വേണ്ടി പൊലിസ് അന്വേഷണം ഊര്‍ജിതമാക്കി. ബേക്കല്‍ മാസ്തി ഗുഡ റെയില്‍വേ ഗേറ്റിനു സമീപത്തു കഴിഞ്ഞ ദിവസം സന്ധ്യയോടെയാണ് സംഭവം.
റെയില്‍വേ ഗേറ്റ് അടച്ചതിനെ തുടര്‍ന്ന് പൊലിസ് ജീപ്പ് നിര്‍ത്തിയിട്ടിരുന്നു. ഇതിനിടയിലാണ് ഗെയിറ്റിന്റെ എതിര്‍വശത്തുണ്ടായിരുന്ന ബൈക്കില്‍ ഉണ്ടായിരുന്നവര്‍ പരിസരത്തുണ്ടായിരുന്ന ഓടപൈപ്പില്‍ എന്തോ തിരുകുന്നത് പൊലിസിന്റെ ശ്രദ്ധയില്‍പെട്ടത്. ഇതിനു ശേഷം ഇവര്‍ രക്ഷപ്പെടുകയും ചെയ്തു.
ട്രെയിന്‍ പോയതിനു ശേഷം പൊലിസ് നടത്തിയ പരിശോധനയില്‍ കഞ്ചാവ് കണ്ടെടുക്കുകയായിരുന്നു. 25 പാക്കറ്റുകളിലായാണ് കഞ്ചാവ് പൊതികള്‍ ഉണ്ടായിരുന്നത്. ബേക്കല്‍ എസ്.ഐ കെ.പി വിനോദ് കുമാറും സംഘവുമാണ് കഞ്ചാവ് പിടിച്ചെടുത്തത്. പ്രദേശത്ത് കഞ്ചാവ് വില്‍പന സംഘം താവളമടിച്ചതായി പൊലിസിനു നേരത്തേ തന്നെ വിവരം ലഭിച്ചിരുന്നു.