കൊടകര: ഇരിങ്ങാലക്കുട രൂപതയുടെ ചരിത്രത്തിലാദ്യമായി കൊടകര സെന്റ് ജോസഫ്‌സ് ഫെറോന പള്ളിയില്‍ മാലാഖക്കൂട്ടം 2017 സംഘടിപ്പിക്കുന്നു. ഫെറോനയിലെ 15 പള്ളികളിളില്‍ നിന്നായി ഈ വര്‍ഷം ആദ്യ കുര്‍ബ്ബാനയും സ്ഥൈര്യലേപനവും സ്വീകരിച്ച മുഴുവന്‍ കുട്ടികളും, 1992 നു ശേഷം വിവാഹിതരായ 4 കുട്ടികളില്‍ കൂടുതലുള്ള ദമ്പതികളും മാലാഖക്കൂട്ടം ചടങ്ങില്‍ പങ്കെടുക്കും. മെയ് 8 ന് 2 ന് കൊടകര സെന്റ് ജോസഫ്‌സ് പള്ളിയിലാണ് പരിപാടിയെന്ന് വികാരി ഫാ. ജോണ്‍സണ്‍.ജി.ആലപ്പാട്ട്, ജോണി വാലപ്പറമ്പില്‍, ലിജോ കട്ട്‌ളപീടിക, ജോഷി നെടുമ്പാക്കാരന്‍, ബിജോയ് ചിരിയങ്കണ്ടത്ത് എന്നിവര്‍ വാര്‍ത്താ സമ്മേളനത്തില്‍ അറിയിച്ചു.
മാലാഖക്കൂട്ടം സംഗമത്തില്‍ ഫെറോന വികാരി ജോണ്‍സണ്‍.ജി.ആലപ്പാട്ടിന്റെ നേതൃത്വത്തില്‍ 25 ഓളം വൈദികരുടെ ഉപകാര്‍മ്മികത്വത്തില്‍ സമൂഹബലി ഉണ്ടായിരിക്കും. തുടര്‍ന്ന് കുട്ടികളുടെയും മാതാപിതാക്കളുടെയും, നാല് മക്കളില്‍ കൂടുതലുള്ള ദമ്പതികളുടെയും സംഗമം പൗരസ്ത്യ കല്‍ദായ സുറിയാനി സഭ മെത്രാപ്പോലീത്ത ഡോ. മാര്‍ അപ്രേം ഉദ്ഘാടനം ചെയ്യും. ഇരിങ്ങാലക്കുട രൂപത വികാരി ജനറല്‍ മോണ്‍ ഡോ. ലാസ്സര്‍ കുറ്റിക്കാടന്‍ അധ്യക്ഷനാവും.