പത്തനംതിട്ട: കേരളത്തിലെ സി.പി.എം അക്രമങ്ങള്‍ക്ക് പ്രചോദനം മുഖ്യമന്ത്രി പിണറായി വിജയനെന്ന് ബി.ജെ.പി സംസ്ഥാന ജനറല്‍ സെക്രട്ടറി എ.എന്‍ രാധാകൃഷ്ണന്‍. പത്തനംതിട്ടയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
ഒ. രാജഗോപാല്‍ എം.എല്‍.എ യുടെ തിരുവനന്തപുരത്തെ ഓഫിസ് സി.പി.എമ്മുകാര്‍ അക്രമിച്ച സംഭവം സംസ്ഥാനത്ത് അരാജകത്വം വ്യാപിക്കുന്നതിന്റെ തെളിവാണ്. ഇരുകൈകളിലും ആയുധവുമായി നടക്കുന്നത് അഭിമാനമായിക്കാണുന്ന മുഖ്യമന്ത്രിയുടെ ഭരണത്തില്‍ ജനങ്ങള്‍ക്ക് ലഭിക്കുന്നത് ഇരുണ്ട രാത്രികളാണ്. എറണാകുളം മഹാരാജാസ് കോളജ് ഹോസ്റ്റലില്‍ നിന്ന് പിടികൂടിയ മാരകായുധങ്ങള്‍ പണിയായുധങ്ങളെന്ന് വരുത്തിത്തീര്‍ക്കാനാണ് മുഖ്യമന്ത്രി ശ്രമിക്കുന്നത്. കണ്ണൂര്‍ നഗരം ഭരിക്കുന്നത് ജയരാജന്മാരാണ്. നിരന്തരം കോടതിയുടെ ശാസന കേള്‍ക്കുന്ന ആദ്യ സര്‍ക്കാരാണിത്. അക്രമികളായ സി.പി.എമ്മിനെ കരിമ്പട്ടികയില്‍പ്പെടുത്തണമെന്നും അദ്ദേഹം പറഞ്ഞു.