കുവൈത്ത് സിറ്റി: അന്തരിച്ച കുവൈത്ത് അമീര്‍ ശൈഖ് സബാഹ് അല്‍ അഹ്മദിന്റെ ഖബറിടം സന്ദര്‍ശിക്കാനായി പ്രമുഖര്‍ അടക്കമുള്ളവരുടെ ഒഴുക്ക്. ഖബറിടത്തിലെത്തുന്ന സന്ദര്‍ശകര്‍ ഖുര്‍ആന്‍ പാരായണം ചെയ്യുകയും അദ്ദേഹത്തിന്റെ പാപമോചനത്തിനായി പ്രാര്‍ഥന നടത്തുകയും ചെയ്യുന്നു.

കുവൈത്ത് ജനതയോടും മറ്റുള്ളവരോടും മനുഷ്യത്വം കാണിച്ച അമീറിന്റെ വിയോഗത്തില്‍ വലിയ ദു:ഖമാണ് കുവൈത്തികള്‍ക്കും രാജ്യത്തുള്ള വിദേശികള്‍ക്കുമുള്ളത്. അമീറിനോട് ജനങ്ങള്‍ക്കുണ്ടായിരുന്ന സ്‌നേഹമാണ് ഇപ്പോള്‍ ഖബറിടത്തില്‍ കാണുന്ന തിരക്ക് സൂചിപ്പിക്കുന്നത്.

ഖബറിട സന്ദര്‍ശനത്തിനെത്തുന്നവര്‍ക്കെല്ലാം അദ്ദേഹത്തെപ്പറ്റി പറയുമ്പോള്‍ നൂറു നാവാണ്. മാനുഷിക മൂല്യങ്ങള്‍ കാത്തുസൂക്ഷിക്കുകയും ജനങ്ങളെ പരിഗണിക്കുകയും ചെയ്തിരുന്നയാളാണ് അമീറെന്ന് സന്ദര്‍ശകര്‍ അനുസ്മരിച്ചു.
രാജ്യത്തെ ജനങ്ങളെ സേവിക്കുന്നതിനൊപ്പം രാജ്യങ്ങള്‍ തമ്മിലുള്ള സമാധാനത്തിനും സഹവര്‍ത്തിത്വത്തിനും അദ്ദേഹം മുന്‍ഗണന നല്‍കി. കുവൈത്തി ജനങ്ങളുമായി ഏറെ അടുപ്പം കാത്തുസൂക്ഷിച്ചിരുന്നതായും സന്ദര്‍ശകര്‍ ഓര്‍ക്കുന്നു. 'അദ്ദേഹം ഞങ്ങളുടെ ഹൃദയത്തില്‍ മരിക്കാതെ ബാക്കിയാവും'- സന്ദര്‍ശകരിലൊരാള്‍ പറഞ്ഞു.