ജിദ്ദ: പത്തനംതിട്ട അടൂർ സ്വദേശി ഷാജി ഗോവിന്ദ് (59) ജിദ്ദയിൽ നിര്യാതനായി. ഏതാനും ദിവസമായി രോഗബാധിതനായി ജിദ്ദ കിംഗ് അബ്ദുള്ള മെഡിക്കൽ സെന്ററിൽ ചികിത്സയിലായിരുന്നു. രണ്ടു പതിറ്റാണ്ടിലേറെയായി ജിദ്ദയിലുള്ള ഇദ്ദേഹം സൗദി ആരോഗ്യ മന്ത്രാലയത്തിനു കീഴിലെ അസീസിയയിലെ സ്ത്രീകളുടെയും കുട്ടികളുടെയും ആശുപത്രിയിലാണ് ജോലി ചെയ്തിരുന്നത്.

ജിദ്ദയിലെ സാമൂഹിക, സാംസ്‌കാരിക, രാഷ്ട്രീയ മേഖലകളിലെ നിറസാന്നിധ്യമായിരുന്നു. പത്തനംതിട്ട ജില്ലാ സംഗമം സ്ഥാപകാംഗം, ഒ ഐ സി സി പത്തനംത്തിട്ട ജില്ലാ കമ്മിറ്റി സെക്രട്ടറി എന്നീ നിലകളിൽ പ്രവർത്തിച്ചിട്ടുണ്ട്. പ്രവാസ ജീവിതം അവസാനിപ്പിച്ച് നാട്ടിലേക്ക് മടങ്ങാനുള്ള തയാറെടുപ്പിനിടെയാണ് മരണം. ഭാര്യയും രണ്ട് കുട്ടികളുമുണ്ട്.