കോഴിക്കോട്: ഇസ്‌ലാമിക ചരിത്രത്തിലെ നാഴികക്കല്ലായ ബദ്ര്‍ യുദ്ധത്തിന്റെ ഓര്‍മപുതുക്കി വിശ്വാസികള്‍ ഇന്ന് ബദ്ര്‍ ദിനം ആചരിക്കും. തിന്മക്കു മേല്‍ നന്മയും വിശ്വാസവും വിജയം നേടിയ ദിനമെന്നാണ് ബദ്ര്‍ ദിനത്തെക്കുറിച്ച് ചരിത്രത്തില്‍ രേഖപ്പെടുത്തിയത്.

ഹിജ്‌റ രണ്ടാം വര്‍ഷം റമദാന്‍ 17നാണു ചരിത്രപ്രസിദ്ധമായ ബദ്ര്‍ യുദ്ധം നടന്നത്. ഇന്നു 1438ാം ബദ്ര്‍ വാര്‍ഷികമാണ് ലോകമെങ്ങും വിശ്വാസികള്‍ ആചരിക്കുന്നത്. മദീനക്കു സമീപമുള്ള മലമ്പ്രദേശത്താണ് ബദ്ര്‍ യുദ്ധം നടന്നത്. യുദ്ധത്തില്‍ 14 പേര്‍ രക്തസാക്ഷിത്വം വഹിച്ചു. ബദ്‌റില്‍ പങ്കെടുത്ത 313 അനുചരരെ ഇസ്‌ലാം ഉന്നതപദവി നല്‍കി ആദരിച്ചതായി ഖുര്‍ആന്‍ സാക്ഷ്യപ്പെടുത്തുന്നു.
ഇവരെ പാരമ്പര്യമായി മുസ്‌ലി സമൂഹം ആദരിച്ചുപോരുന്നു. ബദ്ര്‍ യുദ്ധത്തില്‍ പങ്കെടുത്തവരെ പ്രവാചകന്‍ മുഹമ്മദ് നബിയും അനുചരന്മാരും ആദരിച്ച, പ്രകീര്‍ത്തിച്ച നിരവധി സംഭവങ്ങള്‍ ഹദീസുകളിലുണ്ട്. ഇതിന്റെ വെളിച്ചത്തിലാണ് നാടെങ്ങും ബദ്ര്‍ ദിനം ആചരിക്കുന്നത്. ബദ്ര്‍ ദിനത്തോടനുബന്ധിച്ച് നാടെങ്ങും അനുസ്മരണ ചടങ്ങുകളും മജ്‌ലിസുന്നൂറും നടത്തും.

ബദ്ര്‍ പോരാളികളുടെ 313 പേരുകള്‍ കോര്‍ത്തിണക്കിയാണ് മജ്‌ലിസുന്നൂര്‍ രചിച്ചത്. ജീവകാരുണ്യ പ്രവര്‍ത്തനങ്ങളും ബദ്ര്‍ ദിനത്തിന്റെ ഭാഗമായി വിവിധ മഹല്ലുകളില്‍ സംഘടിപ്പിക്കാറുണ്ട്.