ദമാം: അഞ്ചു മാസത്തോളം ശമ്പളം ലഭിക്കാതെ ബുദ്ധിമുട്ടിയ ബിഹാര്‍ സ്വദേശിനിയായ വീട്ടുജോലിക്കാരിക്ക് മലയാളി സാമൂഹ്യ പ്രവര്‍ത്തകര്‍ തുണയായി. ബിഹാര്‍ പാറ്റ്‌ന സ്വദേശിനി നിഷയാണ് പ്രവാസജീവിതത്തിന്റെ പ്രയാസങ്ങള്‍ തരണം ചെയ്തു നാട്ടിലേയ്ക്ക് മടങ്ങിയത്. ഒന്നരവര്‍ഷം മുന്‍പാണ് നിഷ ദമാമില്‍ സ്വദേശിയുടെ വീട്ടില്‍ ജോലിയ്ക്ക് എത്തിയത്. ജോലിസാഹചര്യങ്ങള്‍ മോശമായിരുന്നെങ്കിലും നാട്ടിലെ അവസ്ഥയോര്‍ത്തു ഇവിടെ ജോലിയില്‍ തന്നെ പിടിച്ചു നില്‍ക്കാന്‍ ശ്രമിക്കുകയായിരുന്നു. വല്ലപ്പോഴുമായിരുന്നു ശമ്പളം ലഭിച്ചിരുന്നത്. അഞ്ചു മാസത്തോളമുള്ള ശമ്പളം കുടിശ്ശികയായതോടെ ശമ്പളം ആവശ്യപ്പെട്ടെങ്കിലും ലഭിക്കാത്തതിനാല്‍ വീട്ടില്‍ നിന്നും ഒളിച്ചു ചാടി അടുത്തുള്ള പൊലിസ് സ്റ്റേഷനില്‍ പോയി പരാതി പറഞ്ഞതിനെ തുടര്‍ന്ന് പൊലിസുകാര്‍ അവരെ ദമാമിലെ വനിതാ അഭയകേന്ദ്രത്തില്‍ എത്തിക്കുകയായിരുന്നു.
ഇവിടെ നിന്നാണ് നവയുഗം ഇവരുടെ രക്ഷക്കായി എത്തിയത്. നവയുഗം ജീവകാരുണ്യപ്രവര്‍ത്തകര്‍ നിഷയുടെ സ്പോണ്‍സറെ ബന്ധപ്പെട്ടെങ്കിലും അയാള്‍ സഹകരിയ്ക്കാന്‍ തയാറായില്ല. തുടര്‍ന്ന് കുടിശ്ശിക ശമ്പളത്തിനായി ലേബര്‍ കോടതിയില്‍ കേസ് കൊടുക്കാന്‍ സാമൂഹ്യ പ്രവര്‍ത്തകര്‍ ഉപദേശിച്ചെങ്കിലും കേസ് പൂര്‍ത്തിയാകാന്‍ മാസങ്ങള്‍ എടുക്കുമെന്നതിനാല്‍ നിഷ അതിനു തയാറായില്ല. കുടുംബപ്രശ്‌നങ്ങള്‍ കാരണം വേഗം നാട്ടില്‍ എത്തിയാല്‍ മതിയെന്ന നിലപാടിലായിരുന്നു അവര്‍.
തുടര്‍ന്ന് സാമൂഹ്യ പ്രവര്‍ത്തക മഞ്ജു മണിക്കുട്ടന്‍ ഇന്ത്യന്‍ എംബസിയുമായി ബന്ധപ്പെട്ട് നിഷയ്ക്ക് ഔട്ട്പാസ് സംഘടിപ്പിക്കുകായായിരുന്നു.