കല്ലൂര്‍: നൂല്‍പ്പുഴ തേക്കുപറ്റ നാലുസെന്റ് കോളനി നിവാസികള്‍ കുടിവെള്ളത്തിനായി ഉപയോഗിക്കുന്നത് മലിന ജലം. കല്ലൂര്‍ തേക്കുപറ്റ കോളനിയിലെ 54 കുടുംബങ്ങളാണ് കുടിവെള്ളത്തിായി മലിന ജലം ഉപയോഗിക്കുന്നത്. മൂന്ന് കിണറുകള്‍ കോളനിയില്‍ ഉണ്ടെങ്കിലും ഇതിലെ ജലം മലിനമാണ്.
കിണറിനടുത്തെത്തിയാല്‍ തന്നെ കിണറില്‍ നിന്ന് അസഹനീയമായ ദുര്‍ഗന്ധമാണ് ഉയരുന്നത്. ഈവെള്ളം പാത്രങ്ങളില്‍ ദിവസങ്ങളോളം എടുത്തുവച്ച് ഊറിയതിനു ശേഷമാണ് നിലവില്‍ ഉപയോഗിക്കുന്നത്.
ഈ വെള്ളം ഉപയോഗിച്ച് പാകം ചെയ്യുന്ന ഭക്ഷണ പദാര്‍ഥങ്ങള്‍ക്ക് വരെ നിറം വ്യത്യാസം കാണുന്നതായി കേളനിയിലെ സ്ത്രീകള്‍ പറയുന്നു. സമീപത്തെ സ്‌കൂള്‍ ഹോസ്റ്റലില്‍ നിന്നുള്ള കക്കൂസ് മാലിന്യം വരെ ഈ കിണറുകളിലേക്ക് ഒഴുകി ഇറങ്ങുന്നതായാണ് കോളനിക്കാര്‍ പറയുന്നത്. ഈ വെള്ളം തന്നെയാണ് കോളനിയിലെ അങ്കണവാടിയിലും ഉപയോഗിക്കുന്നത്. കോളനിയില്‍ ശുദ്ധജലം നല്‍കുന്നതിനായി വര്‍ഷങ്ങള്‍ക്കു മുന്‍പ് ജലനിധി പദ്ധതി ആംരംഭിക്കുമെന്ന് പറഞ്ഞു പണപിരിവു നടത്തിയതായും കോളനിക്കാര്‍ ആരോപിച്ചു.
മഴപെയ്താല്‍ കോളനിയിലെ വീടുകളും ഈ മലിനജലം കൊണ്ടു നിറയും. സമീപത്തെ നീര്‍ച്ചാലുകളില്‍ നിന്നുമാണ് മലിനജലം കോളനികളില്‍ എത്തുന്നത്.
ജില്ലയില്‍ മഞ്ഞപിത്തമടക്കമുള്ള ജലജന്യരോഗങ്ങള്‍ പടര്‍ന്നുപിടിക്കുന്ന സാഹചര്യത്തില്‍ മലിനജലം ഉപയോഗിക്കരുതെന്ന് ആരോഗ്യ വകുപ്പിന്റെ നിര്‍ദ്ദേശമുള്ളപ്പോഴാണ് തേക്കുംപറ്റ കോളനിക്കാര്‍ മലിനജലം കുടിക്കാന്‍ നിര്‍ബന്ധിതരാവുന്നത്. ഈ സാഹചര്യത്തില്‍ കോളനിയിലെ മറ്റൊരു കിണര്‍ കുഴിച്ച് ശുദ്ധജലക്ഷാമത്തിന് പരിഹാരം കാണണമെന്നാണ് നാട്ടുകാരുടെ ആവശ്യം.