കാഞ്ഞങ്ങാട്: സ്‌കൂളിനെ മികവിന്റെ കേന്ദ്രങ്ങളാക്കി മാറ്റുന്ന പ്രവര്‍ത്തനങ്ങള്‍ ഓരോ പൊതു വിദ്യാലയത്തിലും നടന്നുകൊണ്ടിരിക്കെ കുട്ടിച്ചിത്രകാരന്മാര്‍ മതിലില്‍ വര്‍ണ്ണമനോഹര ചിത്രങ്ങള്‍ വരച്ച് ശ്രദ്ധേയരായി.
വേലാശ്വരം എ.യു.പി സ്‌കൂളിന്റെ എഴുപത്തിയഞ്ച് മീറ്റര്‍ നീളം വരുന്ന ചുറ്റുമതിലിലാണ് കുട്ടികള്‍ പല വര്‍ണങ്ങളില്‍ പക്ഷികളേയും, പൂമ്പാറ്റകളേയും, വിവിധ മൃഗങ്ങളേയും മരങ്ങളേയും വരച്ച് ചേര്‍ത്ത് വര്‍ണ മനോഹരമാക്കിയ ചുറ്റുമതില്‍ കഥപറയുന്ന ചിത്രപുസ്തകം പോലെ മനോഹരമാക്കി ഈ കുട്ടിച്ചിത്രകാരന്മാര്‍.
പുല്ലൂര്‍ ദര്‍പ്പണം കലാ കേന്ദ്രത്തിലെ മുപ്പതോളം ചിത്രപ്രതിഭകളാണ് രണ്ടുദിവസം കൊണ്ട് മതിലില്‍ ചിത്രങ്ങള്‍ വരച്ചുതീര്‍ത്തത്. സ്‌കൂളിലെ പൂര്‍വ വിദ്യാര്‍ഥി കൂട്ടായ്മയില്‍ സ്‌കൂള്‍ മതില്‍ വെള്ളതേച്ച് ചിത്രം വരക്കാന്‍ പാകത്തില്‍ ഒരുക്കി നല്‍കി.
മഴനഞ്ഞാല്‍ നശിക്കാത്ത ആക്രിലിക് എമല്‍ഷന്‍ ആണ് ചിത്രം വരക്കാന്‍ ഉപയോഗിച്ചത്. കുട്ടികള്‍ക്ക് ഇതൊരു പുതിയ അനുഭവമായി മാറി.
ചിത്രകാരന്‍ രാജേന്ദ്രന്‍ പുല്ലൂര്‍ ചിത്രം വരച്ചുകൊണ്ട് വര്‍ണ്ണമതില്‍ ഉദ്ഘാടനം ചെയ്തു. അനില്‍ തമ്പായി, അനീഷ് വെള്ളിക്കോത്ത്, രാംഗോകില്‍ പെരിയ എന്നിവര്‍ നേതൃത്വം നല്‍കി.
അശ്വിന്‍ പെരിയ, സിമി, വര്‍ഷവേണു, ദേവിക ബാബു, സായന്ത് വെള്ളിക്കോത്ത്, സ്പന്ദന, ആര്യ, വിഷ്ണു മഹേഷ്, ദേവനന്ദ, ശ്രേയ മുരളി, അശ്വിനി തുടങ്ങിയ കുട്ടികള്‍ ചിത്രങ്ങള്‍ക്ക് വര്‍ണ്ണങ്ങള്‍ നല്‍കി.
പൂര്‍വ വിദ്യാര്‍ഥികളായ പ്രകാശന്‍, അനീഷ്, ചന്തുകുഞ്ഞി, കെ.വി.സുകുമാരന്‍, കെ.ബാലകഷ്ണന്‍, എം.വി രവീന്ദ്രന്‍ മാസ്റ്റര്‍ എന്നിവര്‍ സംസാരിച്ചു.