സ്വന്തം ലേഖിക

കൊച്ചി: സ്വര്‍ണക്കടത്തു കേസുമായി ബന്ധപ്പെട്ട് മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറിനെ ഇന്ന് കസ്റ്റംസ് ചോദ്യം ചെയ്യും.

കഴിഞ്ഞ ജൂലൈ 14ന് ഒമ്പത് മണിക്കൂറും ജൂലൈ 15ന് എട്ട് മണിക്കൂറും ഇദ്ദേഹത്തെ കസ്റ്റംസ് ചോദ്യം ചെയ്തിരുന്നു. ഇത് ഉള്‍പ്പെടെ നയതന്ത്ര ചാനല്‍വഴിയുള്ള സ്വര്‍ണക്കടത്തു കേസുമായി ബന്ധപ്പെട്ട് വിവിധ അന്വേഷണ ഏജന്‍സികള്‍ ഇദ്ദേഹത്തെ 58 മണിക്കൂറാണ് ഇതിനകം ചോദ്യം ചെയ്തത്.

കേസിലെ പുതിയ വെളിപ്പെടുത്തലുകളുടെ പശ്ചാത്തലത്തില്‍ ഇന്നത്തെ ചോദ്യംചെയ്യല്‍ ശിവശങ്കറിനും സംസ്ഥാന സര്‍ക്കാരിനും നിര്‍ണായകമാണ്. ഇതുവരെയുള്ള ചോദ്യംചെയ്യലുകളില്‍ സ്വപ്നയുമായി തനിക്ക് സുഹൃത്ത് ബന്ധം മാത്രമാണ് ഉള്ളതെന്നും സ്വര്‍ണക്കടത്ത് ഉള്‍പ്പെടെയുള്ള അവരുടെ മറ്റ് ഇടപാടുകള്‍ സംബന്ധിച്ച് അറിവില്ലായിരുന്നു എന്ന നിലപാടില്‍ ശിവശങ്കര്‍ ഉറച്ചുനില്‍ക്കുകയാണ് ഉണ്ടായത്. 

എന്നാല്‍ സ്വപ്നയുടേയും സന്ദീപ് നായരുടേയും ലാപ്‌ടോപ്പുകളില്‍നിന്നും മൊബൈല്‍ഫോണുകളില്‍നിന്നും നശിപ്പിച്ചുകളഞ്ഞ 2000ജി.ബി ഡാറ്റ എന്‍.ഐ.എ ഐ.ടി വിദഗ്ധരുടെ സഹായത്തോടെ വീണ്ടെടുത്തിരുന്നു. ഇതില്‍നിന്നുള്ള തെളിവുകള്‍ വിശകലനം ചെയ്തശേഷമാണ് മൂന്നാമതും ചോദ്യം ചെയ്യലിന് ഹാജരാകാന്‍ നോട്ടിസ് നല്‍കിയിരിക്കുന്നത്.