ചെറുപുഴ: പ്രഭാത സവാരിക്കിറങ്ങിയ വീട്ടമ്മയെ അജ്ഞാതന്‍ ആക്രമിച്ചതായി പരാതി. പെരിങ്ങോം കെ.പി നഗറിലെ പുതിയപുരയില്‍ സാവിത്രി(60)ക്കു നേരെയാണ് ഇന്നലെ പുലര്‍ച്ചെ ആക്രമണമുണ്ടായത്. എല്ലാ ദിവസവും അയല്‍വാസികളുമൊത്ത് നടക്കാന്‍ പോകാറുള്ള ഇവര്‍ ഇന്നലെ ഒറ്റയ്ക്കാണത്രേ പോയത്. ഈ സമയം പുറകെ വന്ന അക്രമി ഇവരെ കയറിപിടിക്കുകയും എതിര്‍ക്കാന്‍ ശ്രമിച്ചപ്പോള്‍ തള്ളിയിടുകയും ചെയ്തതായി പറയുന്നു. സ്ത്രീ ബഹളം വച്ചപ്പോള്‍ അക്രമി ഓടിരക്ഷപ്പെട്ടു. കൈക്കും തലയ്ക്കും പരുക്കേറ്റ സാവിത്രി പെരിങ്ങോം താലൂക്ക് ആശുപത്രിയില്‍ ചികിത്സ തേടി. പെരിങ്ങോം പൊലിസ് കേസെടുത്ത് അന്വേഷണമാരംഭിച്ചു.