കോട്ടയം: പി.ജെ ജോസഫില്‍ നിന്നും വ്യക്തിഹത്യ നേരിട്ടെന്നും പാലാ തെരഞ്ഞെടുപ്പില്‍ ചതിക്കപ്പെട്ടെന്നുമുള്ള ജോസ് കെ മാണിയുടെ പ്രസ്താവനയ്ക്ക് മറുപടിയുമായി കേരള കോണ്‍ഗ്രസ് നേതാവ് പി.ജെ ജോസഫ്. പാലായില്‍ അടക്കം ജോസ് കെ മാണി പരാജയങ്ങള്‍ ഏറ്റുവാങ്ങിയതാണ്. ജോസ് കെ. മാണിയാണ് യു.ഡി.എഫിനകത്തു നിന്ന് ചെയ്യാന്‍ പാടില്ലാത്തത് ചെയ്തതെന്നും പാലായില്‍ മാണി സാറാണ് ചിഹ്നമെന്ന് പറഞ്ഞ് മത്സരിച്ച് തോറ്റ ശേഷം തോല്‍പ്പിച്ചതാണെന്ന് പറയുന്നതില്‍ എന്ത് ന്യായമാണ് ഉള്ളതെന്നും പി.ജെ ജോസഫ് ചോദിച്ചു.

പാലാ തെരഞ്ഞെടുപ്പില്‍ ചിഹ്നം വേണ്ട എന്നും ചിഹ്നം മാണി സാറാണെന്നും പറഞ്ഞാണ് ജോസ് കെ. മാണി മത്സരിച്ചത്. തെരഞ്ഞെടുപ്പ് പ്രചരണ വേദിയില്‍ വെച്ചാണ് ചിഹ്നം മാണി സാറാണെന്ന് ജോസ് കെ. മാണി പ്രഖ്യാപിച്ചത്. പിന്നെ എങ്ങനെയാണ് ചിഹ്നം കൊടുത്തില്ല എന്ന ആക്ഷേപം വരുന്നത്. വഞ്ചിച്ചത് ഞാനല്ല ജോസ് കെ. മാണിയാണെന്ന് പി ജെ ജോസഫ് കൂട്ടിചേര്‍ത്തു.

നിയമസഭയില്‍ മാണി സാറിനെ ബജറ്റ് അവതരിപ്പിക്കുന്നതില്‍ നിന്നും തടയുകയും സ്പീക്കറുടെ ഡയസില്‍ കയറി കസേര മറിച്ചിടുകയും മാണി സാറിനെ വളഞ്ഞുവെച്ച് ആക്ഷേപിക്കുകയും ചെയ്തവരുടെ കൂടെയാണ് ഇപ്പോള്‍ ജോസ് പോയത്. അന്ന് യു.ഡി.എഫാണ് മാണി സാറിനൊപ്പം നിന്നത്. അത് മറന്നുകൊണ്ടാണ് അദ്ദേഹം പ്രവര്‍ത്തിച്ചുകൊണ്ടിരിക്കുന്നത്.

കോട്ടയം ജില്ലാ പഞ്ചായത്തില്‍ എട്ട് മാസം അവരുടെ വിഭാഗത്തിനും ആറ് മാസം ഞങ്ങളുടെ വിഭാഗത്തിനുമെന്ന ധാരണ പാലിക്കാത്തതാണ് അവര്‍ സ്വയം പുറത്തുപോകാന്‍ കാരണമായത്. ആരും പുറത്താക്കിയതല്ല. യു.ഡി.എഫിലെ മുഴുവന്‍ ഘടകകക്ഷികളും പറഞ്ഞിട്ടും അത് കേള്‍ക്കാതെയാണ് അദ്ദേഹം കാര്യങ്ങള്‍ ചെയ്തതെന്നും പി.ജെ ജോസഫ് കുറ്റപ്പെടുത്തി.

യു.ഡി.എഫ് കെ.എം മാണിയെ അപമാനിക്കുകയാണെന്നും മാണി സാറിന്റെ പാര്‍ട്ടിയെ ഇല്ലാതാക്കുക എന്ന അജണ്ടയിലാണ് യു.ഡി.എഫ് പ്രവര്‍ത്തിക്കുന്നതെന്നും ജോസ് കെ. മാണി വാര്‍ത്താ സമ്മേളനത്തില്‍ പറഞ്ഞിരുന്നു. ആത്മാഭിമാനം അടിയറവ് വെച്ച് ഞങ്ങള്‍ക്ക് മുന്നോട്ട് പോകാന്‍ കഴിയില്ലെന്നും ഇടതുപക്ഷ ജനാധിപത്യ മുന്നണിയുമായി ചേര്‍ന്നു പ്രവര്‍ത്തിക്കുമെന്നും ജോസ് കെ. മാണി പറഞ്ഞു.