തലശ്ശേരി: തലശ്ശേരി പുതിയ ബസ്റ്റാന്റില്‍ നിന്ന് സര്‍വിസ് നടത്തുന്ന കെ.എസ്.ആര്‍.ടി.സി ബസുകള്‍ക്ക് അനുവദിച്ച സ്ഥലത്തിന് വിരുദ്ധമായി പാര്‍ക്ക് ചെയ്ത് യാത്രക്കാരെ കയറ്റുന്നതായി പരാതി.
തലശ്ശേരി പ്രൈവറ്റ് ബസ്സ് ഓപ്പറേറ്റേഴ്‌സ് അസോസിയഷന്‍ ഭാരവാഹികളാണ് ഇത് സംബന്ധിച്ച് തലശ്ശേരി നഗരസഭാ ചെയര്‍മാന്‍, സെക്രട്ടറി, അസി.ട്രാന്‍സ്‌പോര്‍ട്ട് ഓഫിസര്‍, ട്രാഫിക് എസ്.ഐ എന്നിവര്‍ക്ക് പരാതി നല്‍കിമാനന്തവാടി ഭാഗത്തേക്ക് പോകുന്നതിന് പുതിയ ബസ്റ്റാന്റിലെ ദേശാഭിമാനി ബുക്ക് സ്റ്റാളിന് സമീപമാണ് കെ.എസ്.ആര്‍.ടി.സി ബസുകള്‍ക്ക് സ്ഥലം അനുവദിച്ചിരുന്നത്.
എന്നാല്‍ ഇതിന് വിരുദ്ധമായി ലാവണ്യ കോംപ്ലക്‌സിന് സമീപം സ്വകാര്യ ബസുകള്‍ക്ക് അനുവദിച്ച പാര്‍ക്കിങ് സ്ഥലത്ത് കെ.എസ്.ആര്‍.ടി.സി ബസ് നിര്‍ത്തിയിട്ട് യാത്രക്കാരെ കയറ്റുന്നതായാണ് പരാതി. അത് പോലെ വീരാജ്‌പേട്ട ഭാഗങ്ങളില്‍ സര്‍വിസ് നടത്തുന്ന കെ.എസ്.ആര്‍.ടി.സി ബസുകള്‍ ഇരിട്ടി ഭാഗത്തേക്ക് പോകുന്ന സ്വകാര്യ ബസുകള്‍ക്ക് അനുവദിച്ച സ്ഥലത്ത് പാര്‍ക്ക് ചെയ്ത് യാത്രക്കാരെ കയറ്റുന്നതായും പരാതിയില്‍ പറയുന്നു.
ഇത്തരത്തില്‍ അനുവദിക്കപ്പെട്ട ട്രാക്കിന് വിരുദ്ധമായി സര്‍വിസ് നടത്തുന്നത് കാരണം സ്വകാര്യ ബസുകള്‍ക്ക് സാമ്പത്തിക നഷ്ടവും ജീവനക്കാര്‍ തമ്മില്‍ കൈയാങ്കളിക്കും ഇടയാക്കുന്നു. മത്സര ഓട്ടം നടത്തുക വഴി അപകടം ക്ഷണിച്ച് വരുത്തുന്നതായും പരാതിയില്‍ പറയുന്നു.