ടോക്കിയോ: ഇറാനില്‍ ഭരണമാറ്റമുണ്ടാക്കാന്‍ യു.എസ് ശ്രമിക്കുന്നില്ലെന്ന് പ്രസിഡന്റ് ഡൊണാള്‍ഡ് ട്രംപ്. ജപ്പാനില്‍ പ്രധാനമന്ത്രി ഷിന്‍സോ ആബെയോടൊപ്പം നടത്തിയ സംയുക്ത വാര്‍ത്താസമ്മേളനത്തിലാണ് അദ്ദേഹം ഇക്കാര്യം പറഞ്ഞത്.
ഭയാനകമായ കാര്യങ്ങള്‍ സംഭവിക്കാന്‍ ആരും ഇഷ്ടപ്പെടുന്നില്ലെന്ന് അകാസക കൊട്ടാരത്തില്‍ മാധ്യമങ്ങളോട് ട്രംപ് പറഞ്ഞു. അതിനിടെ ഇറാനും യു.എസിനുമിടയില്‍ മധ്യസ്ഥ ശ്രമത്തിന് തയാറാണെന്ന് ജപ്പാന്‍ അറിയിച്ചു.
പശ്ചിമേഷ്യയില്‍ കൂടുതല്‍ സൈനികസംഘങ്ങളെ വിന്യസിക്കാന്‍ അനുമതി നല്‍കിയ ട്രംപിന്റെ പ്രസ്താവനക്ക് രാഷ്ട്രീയ വിദഗ്ധര്‍ വലിയ പ്രാധാന്യമാണ് കൊടുക്കുന്നത്. ജപ്പാന്റെ പുതുതായി സ്ഥാനമേറ്റ നെരൂഹിതോ ചക്രവര്‍ത്തിയെ സന്ദര്‍ശിക്കുന്ന ആദ്യ വിദേശ നേതാവാണ് ട്രംപ്.
ജപ്പാനില്‍ ആബെയോടൊപ്പം ഗോള്‍ഫ് കളിക്കാനും സുമോ ഗുസ്തി കാണാനും ട്രംപ് സമയം കണ്ടെത്തി.
ഉത്തര കൊറിയയുടെ മിസൈല്‍ പരീക്ഷണത്തില്‍ ആശങ്കപ്പെടുന്നില്ലെന്നു പറഞ്ഞ ട്രംപ് സാമ്പത്തിക ശക്തിയുള്ള ഒരു രാജ്യം കെട്ടിപ്പടുക്കാനാണ് കിം ജോങ് ഉന്‍ ശ്രമിക്കേണ്ടതെന്ന് ഊന്നിപ്പറഞ്ഞു. ഇത്തരമൊരു ലക്ഷ്യവുമായി ഒത്തുപോവുന്നതല്ല ആണവ പരീക്ഷണമെന്നും അദ്ദേഹം കൂട്ടിച്ചേര്‍ത്തു. നേരത്തെ ഉ.കൊറിയയുടെ ഹ്രസ്വദൂര മിസൈല്‍ പരീക്ഷണം യു.എന്‍ ഉപരോധ ലംഘനമാണെന്ന് യു.എസ് ദേശീയ സുരക്ഷാ ഉപദേഷ്ടാവ് ജോണ്‍ ബോള്‍ട്ടന്‍ പറഞ്ഞിരുന്നു. യു.എസിന്റെ 105 എഫ്.35 സ്റ്റെല്‍ത്ത് യുദ്ധവിമാനങ്ങള്‍ വാങ്ങാന്‍ ജപ്പാന്‍ സമ്മതിച്ചതായി ട്രംപ് പറഞ്ഞു.