ന്യൂഡല്‍ഹി: ഐ.പി.എല്ലില്‍ കൊല്‍ക്കത്തയുടെ താരമായിരുന്ന റിങ്കു സിങ്ങിനെ ബി.സി.സി.ഐ സസ്‌പെന്‍ഡ് ചെയ്തു. അബൂദബിയില്‍ നടന്ന ടി20 ടൂര്‍ണമെന്റില്‍ ബി.സി.സി.ഐയുടെ അനുവാദമില്ലാതെ പങ്കെടുത്തതിനാണ് നടപടി. ആഭ്യന്തര ക്രിക്കറ്റില്‍ ഉത്തര്‍ പ്രദേശിനുവേണ്ട@ി സ്ഥിരതയാര്‍ന്ന പ്രകടനം നടത്തിയ കളിക്കാരനാണ് റിങ്കു. അനുമതിയില്ലാതെ മത്സരത്തില്‍ പങ്കെടുത്തത് ബി.സി.സി.ഐയുടെ നിയമാവലിക്ക് വിരുദ്ധമാണ്.
ബോര്‍ഡുമായി രജിസ്‌ട്രേഷന്‍ നടത്തിയ കളിക്കാരന് ബി.സി.സി.ഐയുടെ അനുമതിയില്ലാതെ ഒരു ടൂര്‍ണമെന്റിലും കളിക്കാന്‍ കഴിയില്ല. മൂന്ന് മാസത്തേക്ക് താരത്തെ സസ്‌പെന്‍ഡ് ചെയ്തതായിട്ടാണ് ബി.സി.സി.ഐ അറിയിച്ചത്.നാളെ മുതലാണ് സസ്‌പെന്‍ഷന്‍ നിലവില്‍ വരിക. ഇതോടെ ശ്രീലങ്ക എ ടീമിനെതിരേ കളിക്കുന്ന ഇന്ത്യ എ ടീമില്‍നിന്ന് റിങ്കുവിനെ ഒഴിവാക്കി.