കോഴിക്കോട്: മെഡിക്കല്‍ കോളജ് ആശുപത്രിയില്‍ നിപാ കാലത്തുള്‍പ്പെടെ ദീര്‍ഘകാലം താല്‍ക്കാലിക ജീവനക്കാരായിരുന്നവരെ പിരിച്ചു വിടുന്നതിനെതിരെയുള്ള സമരം ശക്തമാകുന്നു. നിരാഹാര സമരം ആറാം ദിവസത്തിലേക്ക് കടന്നു. കഴിഞ്ഞ അഞ്ച് ദിവസമായി സമരം നടത്തിയിരുന്ന ഇ പി രജീഷിനെ ശാരീരിക അവശതകളെ തുടര്‍ന്ന് ആശുപത്രിയില്‍ പ്രവേശിപ്പിച്ചു. പകരം താല്‍ക്കാലിക ജീവനക്കാരിയായിരുന്ന വി എന്‍ പ്രേമ സമരം ഏറ്റെടുത്തു.
അഞ്ച് മാസം മുന്‍പാണ് 47 താല്‍ക്കാലിക ജീവനക്കാരെ പിരിച്ച് വിട്ടുകൊണ്ടുള്ള ഉത്തരവിറങ്ങിയത്. നാല് മുതല്‍ ഇരുപത് വര്‍ഷം വരെ മെഡിക്കല്‍ കോളജ് ആശുപത്രിയില്‍ സേവനമനുഷ്ടിച്ചവരാണ് ഉത്തരവ് ലഭിച്ചവര്‍.

നിരവധി തവണ ഉത്തരവ് റദ്ദാക്കണമെന്നാവശ്യപ്പെട്ട് സമരം ചെയ്‌തെങ്കിലും ഫലമുണ്ടായില്ല. ആരോഗ്യ മന്ത്രി മെഡിക്കല്‍ കോളജില്‍ എത്തിയപ്പോള്‍ പ്രയാസം നേരിട്ട് പറഞ്ഞു. ജോലി സ്ഥിരപ്പെടുത്താന്‍ കഴിയില്ലെങ്കിലും താല്‍ക്കാലിക ജീവനക്കാര്‍ എന്ന നിലയില്‍ തുടരാന്‍ സൗകര്യം ഒരുക്കുമെന്നാണ് അന്ന് മന്ത്രി ഇവര്‍ക്ക് ഉറപ്പ് കൊടുത്തത്. നിപ്പ വൈറസ് ഭീതി വിതച്ച സമയത്ത് മെഡിക്കല്‍ കോളജ് ജീവനക്കാര്‍ പോലും ഭയന്ന് പിന്‍മാറിയപ്പോള്‍ താല്‍ക്കാലിക ജീവനക്കാര്‍ മികച്ച സേവനമായിരുന്നു കാഴ്ച വച്ചത്. എന്നാല്‍ ഇക്കാര്യം സര്‍ക്കാരിന്റെ പരിഗണനയില്‍ ഉണ്ടെന്നും ജോലി സ്ഥിരപ്പെടുത്താന്‍ കഴിയില്ലെന്നുമാണ് ആരോഗ്യ വകുപ്പിന്റെ വിശദീകരണം.