കൊച്ചി: കോടതിയെ തെറ്റിദ്ധരിപ്പിച്ചു ഹരജി സമര്‍പ്പിച്ച ഡിസ്റ്റിലറി ഉടമക്ക് അഞ്ചു ലക്ഷം രൂപ പിഴ കോടതി ചെലവായി നല്‍കണമെന്നു ഹൈക്കോടതി ഉത്തരവിട്ടു. കാക്കനാട് ദേവകുളം ഡിസ്റ്റിലറീസ് ഉടമക്കെതിരെയാണ് ജസ്റ്റിസ് അനില്‍ കെ. നരേന്ദ്രന്‍ പിഴയിട്ടത്. പിഴ സംഖ്യ ലീഗര്‍ സര്‍വിസ് അതോറിറ്റിയില്‍ കെട്ടിവയ്ക്കണം. വിദേശമദ്യങ്ങള്‍ക്ക് ബ്രാന്‍ഡ് രജിസ്റ്റര്‍ ചെയ്യാനുള്ള വ്യവസ്ഥയും രജിസ്‌ട്രേഷന്‍ കാലാവധി നീട്ടി നല്‍കാനുള്ള വ്യവസ്ഥയും ചോദ്യംചെയ്താണ് ഡിസ്റ്റിലറി ഉടമ ഹരജി നല്‍കിയത്.
സമാന കേസില്‍ ഹൈക്കോടതി സ്‌റ്റേ അനുവദിച്ചിട്ടുണ്ടെന്നു പറഞ്ഞാണ് ഹരജി സമര്‍പ്പിച്ചത്. എന്നാല്‍ കോടതിയുടെ പരിശോധനയില്‍ ഇത്തരത്തിലുള്ള സ്‌റ്റേ ഇല്ലെന്നു ബോധ്യപ്പെട്ടതിനെ തുടര്‍ന്നാണ് പിഴ നല്‍കാന്‍ കോടതി നിര്‍ദേശിച്ചത്.