ഒലവക്കോട്: റെയില്‍വേസ്റ്റേഷനുകളില്‍ ദിവസവേതനത്തിന് ജോലിചെയ്യുന്ന ശുചീകരണത്തൊഴിലാളികള്‍ക്ക് പുതുക്കിയ മിനിമം കൂലി നിഷേധിക്കുന്നതായി പരാതി. പ്ലാറ്റ്‌ഫോമും പാളവും മറ്റും വൃത്തിയാക്കുന്നതിന് നിയോഗിച്ച കരാര്‍ തൊഴിലാളികള്‍ക്കാണ് രണ്ടരമാസത്തെ പുതുക്കിയ വേതനം നല്‍കിയില്ലെന്ന് പരാതിയുള്ളത്. 250 രൂപ ദിവസക്കൂലിക്കാണ് ഇവര്‍ ജോലി ചെയ്തിരുന്നത്.
ദിവസം 8 മണിക്കൂര്‍ വീതം 5 ഷിഫ്റ്റുകളായാണ് ജോലി ക്രമീകരിച്ചിട്ടുള്ളത്. 2017 ജനുവരി 19 മുതല്‍ ദിവസവേതനം 350 രൂപയായി ഉയര്‍ത്തി കേന്ദ്രലേബര്‍ കമ്മീഷണറുടെ ഉത്തരവിറങ്ങി. എന്നാല്‍, തുടര്‍ന്നും 250 രൂപ തന്നെയാണ് നല്‍കുന്നതെന്ന് തൊഴിലാളികള്‍ പറഞ്ഞു.
കേരളത്തിലെ റെയില്‍വേ സ്റ്റേഷനുകളില്‍ 1500 ഓളം താത്കാലിക ശുചീകരണത്തൊഴിലാളികളുണ്ടെന്ന് റെയില്‍വേ കോണ്‍ട്രാക്ട് കാറ്ററിങ് ആന്‍ഡ് ജനറല്‍ വര്‍ക്കേഴ്‌സ് യൂണിയന്‍ (സി.ഐ.ടി.യു) പറയുന്നു. പല ഏജന്‍സികളാണ് ഇവരുടെ കരാറെടുത്തിട്ടുള്ളത്. റെയില്‍വേയും കരാറുകാരും തമ്മിലുള്ള കൂലിത്തര്‍ക്കം മൂലം തൊഴിലാളികള്‍ക്കുണ്ടായ നഷ്ടം റെയില്‍വേ നികത്തണമെന്നാണ് യൂനിയന്റെ ആവശ്യം.
കഴിഞ്ഞ മാര്‍ച്ചില്‍ നിലവിലുണ്ടായിരുന്ന കരാര്‍ അവസാനിച്ചു. പുതിയ കരാറില്‍ റെയില്‍വേ തുക ഉയര്‍ത്തി നല്‍കിയാല്‍ തൊഴിലാളികള്‍ക്ക് പുതുക്കിയ വേതനം നല്‍കുന്നതില്‍ വിരോധമില്ലെന്ന് ഇവര്‍ പറയുന്നു. അപ്പോഴും ജനുവരി 19 മുതല്‍ മാര്‍ച്ച് 31 വരെയുള്ള അധികവേതനം നല്‍കുന്നതിനുള്ള ബാധ്യത തങ്ങള്‍ക്കില്ലെന്നാണ് ഇവരുടെ നിലപാട്.
റെയില്‍വേ ഈ വാദം പരിശോധിക്കുന്നുണ്ടെന്നും പുതിയ കരാര്‍ നല്‍കുമ്പോള്‍ ഉയര്‍ത്തിയ വേതനത്തിന്റെ കുടിശ്ശിക പരിഗണിക്കുമെന്നും റെയില്‍വേ അധികൃതര്‍ അറിയിച്ചു.
അടുത്ത കരാറിനുള്ള നടപടിക്രമങ്ങള്‍ പൂര്‍ത്തിയാകുന്നതുവരെ താത്കാലികമായി കരാറെടുത്തവര്‍ പുതുക്കിയ വേതനം തൊഴിലാളികള്‍ക്ക് നല്‍കുന്നുണ്ട്.