ന്യൂഡല്‍ഹി: പാര്‍ട്ടിയുടെ അടിത്തറ ശക്തമാക്കി ജനങ്ങളിലേക്ക് ഇറങ്ങാന്‍ ഭാരത യാത്രക്കൊരുങ്ങി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. ആന്ധ്രയില്‍ ജഗന്‍ മോഹന്‍ റെഡ്ഡിയുടെ 14 മാസം നീണ്ട 'പ്രജാ സങ്കല്‍പ യാത്ര'യ്ക്ക് സമാനമായി 'ഭാരത യാത്ര' നടത്താനാണ് രാഹുല്‍ ആലോചിക്കുന്നത്.

തെലുഗുദേശം പാര്‍ട്ടിയെ തകര്‍ത്ത് ജഗന് അധികാരത്തിലേറാന്‍ വൈ.എസ്.ആര്‍ കോണ്‍ഗ്രസിനെ യാത്ര സഹായിച്ചതെന്ന് തിരിച്ചറിഞ്ഞാണ് രാഹുല്‍ ഭാരത യാത്രയ്ക്ക് ഒരുങ്ങുന്നത്. നേരത്തെ തന്നെ ഇത്തരത്തിലൊരു യാത്രയ്ക്ക് അദ്ദേഹം തീരുമാനിച്ചിരുന്നെങ്കിലും ലോക്‌സഭാ തെരഞ്ഞെടുപ്പ് പ്രഖ്യാപനം വന്നതോടെ അതിനു സാധ്യമായില്ല.

ഓരോ സംസ്ഥാനങ്ങളിലേയും ജനങ്ങളുടെ പ്രശ്‌നങ്ങള്‍ നേരിട്ട് മനസിലാക്കാനും രാജ്യത്തിന്റെ പൊതുവായ പ്രശ്‌നങ്ങള്‍ മനസിലാക്കാനും യാത്ര ഉപകാരപ്പെടുമെന്നാണ് രാഹുല്‍ കണക്കുകൂട്ടുന്നത്. ജനങ്ങളുമായി കൂടുതല്‍ ഇടപഴകാന്‍ ഭാരത യാത്രയിലൂടെ കഴിയും. പദയാത്രയായും കാറിലും പൊതുഗതാഗത സംവിധാനങ്ങളിലും സഞ്ചരിച്ചുകൊണ്ടാണ് ഭാരതയാത്ര വിഭാവനം ചെയ്യുന്നത്. ഇക്കാര്യത്തില്‍ കൂടുതല്‍ ചര്‍ച്ചകള്‍ നടന്നിട്ടില്ലെങ്കിലും താമസിയാതെ അന്തിമ രൂപരേഖ ഉണ്ടാകുമെന്ന് കോണ്‍ഗ്രസ് നേതാക്കള്‍ പറയുന്നു.