മനാമ: ബഹ്‌റൈനില്‍ വാഹനാപകടത്തില്‍ മരണപ്പെട്ട കോഴിക്കോട് പേരാമ്പ്ര സ്വദേശി തയ്യുള്ള പറമ്പില്‍ അജ്മലിന്റെ (30) മൃതദേഹം ഇന്ന് ചൊവ്വാഴ്ച വൈകിട്ട് ഏഴുമണിയോടെ കോഴിക്കോട് എയര്‍പോര്‍ട്ടിലെത്തിക്കും.
ബഹ്‌റൈനില്‍ പെരുന്നാള്‍ ദിനത്തിലായിരുന്നു അജ്മല്‍ അപകടത്തില്‍ പെട്ടത്.
പുലര്‍ച്ചെ 3മണിയോടെ അല്‍ ഫതാഹ് ഹൈവേയില്‍ റോഡ് മുറിച്ച് കടക്കുമ്പോള്‍ സ്വദേശിയുടെ കാര്‍ ഇടിക്കുകയിരുന്നു. ഉടന്‍ ആശുപത്രിയില്‍ എത്തിച്ചെങ്കിലും മരിച്ചു.

പെരുന്നാള്‍ ദിനത്തില്‍ മന്ത്രാലയങ്ങള്‍ അവധിയിലായതിനാല്‍ നടപടിക്രമങ്ങള്‍ പൂര്‍ത്തിയാക്കാനായി മൃതദേഹം അധികൃതര്‍ മോര്‍ച്ചറിയിലേക്ക് മാറ്റുകയായിരുന്നു.
എന്നാല്‍ ഈ വിവരമൊന്നും ബഹ്‌റൈനിലെ ബന്ധുക്കളോ സുഹൃത്തുക്കളോ നാട്ടുകാരോ അറിഞ്ഞിരുന്നില്ല.

ഇതിനിടെ മാതാവ് നാട്ടില്‍നിന്നും മകനെ ഫോണില്‍ കിട്ടുന്നില്ലെന്ന് പറഞ്ഞ് ബഹ്‌റൈനിലുള്ള ബന്ധുക്കളെ വിളിച്ചപ്പോഴാണ് അജ്മലിനെ കുറിച്ച് അന്വേഷണം ആരംഭിച്ചത്. ഹൂറ പൊലിസ് സ്റ്റേഷനില്‍ എത്തിയപ്പോഴാണ് അപകടമരണമറിഞ്ഞ്
മോര്‍ച്ചറിയിലെത്തി അജ്മലിനെ തിരിച്ചറിയുന്നത്.
ബഹ്‌റൈനില്‍ സ്വകാര്യ ട്രേഡിങ് കമ്പനിയില്‍ സെയില്‍സ്മാനായിരുന്നു അജ്മല്‍. തമന്നയാണ് ഭാര്യ, പിതാവ് കുഞ്ഞുഹസന്‍, മാതാവ് സഫിയ, സഹോദരങ്ങള്‍: അജ്‌നാസ് (ബഹ്‌റൈന്‍), തസ്‌നി.