ലഖ്‌നൗ: ഉത്തര്‍പ്രദേശില്‍ കഴിഞ്ഞ 24 മണിക്കൂറിനിടെയുണ്ടായ പൊടിക്കാറ്റ്, മിന്നല്‍, മഴ എന്നിവയെ തുടര്‍ന്ന് 17 പേര്‍ മരിച്ചു. സിദ്ധാനഗര്‍ നാല്, ദിയോറിയയില്‍ മൂന്ന്, ബസ്തി മൂന്ന്, ബെല്ല രണ്ട്, അസംഗ്ര, കുഷ്‌നിഗര്‍, മഹാരജഗഞ്ജ്, ലക്ഷിപൂര്‍, ഫില്‍ബിറ്റ് എന്നിവിടങ്ങള്‍ ഓരോ ആള്‍ വീതവും മരിച്ചു.
സിദ്ധാനഗറില്‍ ടിന്നിന്റെ കൂര തകര്‍ന്നാണ് തൊഴിലാളിയായ റഹീം മരിച്ചത്. രണ്ട് സ്ത്രീകള്‍ക്ക് പരുക്കേറ്റു. ബസ്തിയില്‍ ബ്രിബന്‍ യാദവ് പാടത്ത് ജോലി ചെയ്യുന്നതിനിടെ മിന്നലേറ്റാണ് മരിച്ചത്. ബസ്തിയിലെ തന്നെ ദെബ്രു ഗ്രാമത്തില്‍ 13 കാരനായ വിശാല്‍ മരം ശരീരത്തില്‍ വീണാണ് മരിച്ചത്. മെഡിക്കല്‍ ഷോപ്പില്‍ നിന്ന് വരുന്നതിനിടെയായാരുന്നു അപകടം. വിശാലിന്റെ കൂടെയുണ്ടായിരുന്ന എട്ട് വയസുകാരന്‍ ഗോലുവിനെ ഗുരുതര പരുക്കുകളോടെ ആശുപത്രിയില്‍ പ്രവേശിപ്പിച്ചു. സംഭവത്തില്‍ മുഖ്യമന്ത്രി യോഗി ആദിത്യനാഥ് അനുശോചനം രേഖപ്പെടുത്തി.