ന്യൂഡല്‍ഹി: ലോക്‌സഭാ തെരഞ്ഞെടുപ്പിന് പിന്നാലെ ബാലറ്റ് പേപ്പര്‍ തിരിച്ചുകൊണ്ടുവരണമെന്ന ആവശ്യം വീണ്ടും സജീവമാവുന്നു. ബാലറ്റ് പേപ്പര്‍ ഉപയോഗിച്ച് വീണ്ടും തെരഞ്ഞെടുപ്പ് നടത്തണമെന്ന ആവശ്യവുമായി സുപ്രിംകോടതിയില്‍ ഹരജിയെത്തി. ഹരജിയില്‍ അടിയന്തരമായി വാദംകേള്‍ക്കണമെന്ന് ഹരജിക്കാര്‍ ആവശ്യപ്പെട്ടെങ്കിലും അക്കാര്യം സുപ്രിംകോടതി വിസമ്മതിച്ചു. ഇലക്ട്രോണിക് വോട്ടിങ് യന്ത്രങ്ങള്‍ ഉപയോഗിക്കുന്നത് ഭരണഘടനാവിരുധമാണെന്ന് പ്രഖ്യാപിക്കണമെന്നും ഹരജിയില്‍ ആവശ്യപ്പെട്ടിട്ടുണ്ട്. പൊതുതാല്‍പര്യ വിഷയങ്ങളില്‍ ഇടപെട്ട് വരാറുള്ള അഭിഭാഷകന്‍ എം.എല്‍ ശര്‍മയാണ് ഹരജിക്കാരന്‍.
വോട്ടിങ് യന്ത്രം സംബന്ധിച്ച ജനപ്രാതിനിധ്യനിയമത്തിലെ 61എ വകുപ്പിന്റെ നിയമസാധുത ചോദ്യംചെയ്ത ഹരജിക്കാരന്‍, ബാലറ്റ് പേപ്പര്‍ ഉപയോഗിച്ച് ലോക്‌സഭാ തെരഞ്ഞെടുപ്പ് വീണ്ടും നടത്തണമെന്നും ആവശ്യപ്പെട്ടു. ഹരജി എന്നു പരിഗണിക്കണമെന്ന് ലിസ്റ്റ് ചെയ്യുന്നതിന് രജിസ്ട്രിയെ സമീപിക്കാന്‍ ഹരജിക്കാരന് സുപ്രിംകോടതി നിര്‍ദേശം നല്‍കി. ജഡ്ജിമാരായ അജയ് രസ്‌തൊഗിയും സൂര്യകാന്തും ഉള്‍പ്പെടുന്ന അവധിക്കാല ബെഞ്ചാണ് കേസ് പരിഗണിച്ചത്. ലോക്‌സഭാ തെരഞ്ഞെടുപ്പില്‍ 50 ശതമാനം വിവിപാറ്റും എണ്ണിനോക്കണമെന്നാവശ്യപ്പെട്ട് കോണ്‍ഗ്രസ് ഉള്‍പ്പെടെയുള്ള 21 രാഷ്ട്രീയ പാര്‍ട്ടികള്‍ നല്‍കിയ ഹരജി തള്ളുകയായിരുന്നു.
അതേസമയം, ബാലറ്റ് പേപ്പറുകള്‍ ഉപയോഗിച്ച് തെരഞ്ഞെടുപ്പ് നടത്തുന്ന സംവിധാനം തിരികെകൊണ്ടുവരണമെന്നാവശ്യപ്പെട്ട് പ്രക്ഷോഭം തുടങ്ങുമെന്ന് പശ്ചിമ ബംഗാള്‍ മുഖ്യമന്ത്രിയും തൃണമൂല്‍ കോണ്‍ഗ്രസ് നേതാവുമായ മമത ബാനര്‍ജി അറിയിച്ചു. ഒരു തെരഞ്ഞെടുപ്പിലും വോട്ടിങ് യന്ത്രങ്ങള്‍ ഉപയോഗിക്കേണ്ടതില്ലെന്നതാണ് തൃണമൂല്‍ കോണ്‍ഗ്രസിന്റെ നിലപാട്. ബാലറ്റ് പേപ്പറുകളാണ് ഉപയോഗിക്കേണ്ടത്. രാജ്യത്ത് ജനാധിപത്യം പുനഃസ്ഥാപിക്കാനുള്ള ഒരേ ഒരുവഴി ബാലറ്റ് പേപ്പറിലേക്കു തിരികെ പോവുകയെന്നതാണ്. വോട്ടിങ് യന്ത്രങ്ങളുടെ പ്രോഗ്രാമിങ്ങില്‍ മാറ്റം വരുത്തിയിരുന്നില്ലെങ്കില്‍ ലോക്‌സഭാ തെരഞ്ഞെടുപ്പില്‍ ബി.ജെ.പിക്കു വിജയിക്കാന്‍ കഴിയുമായിരുന്നില്ല. തെരഞ്ഞെടുപ്പിനിടെ പല വോട്ടിങ് യന്ത്രങ്ങളും കേടായപ്പോള്‍ പരിശോധനയ്ക്കു വിധേയമാക്കാത്ത പുതിയ യന്ത്രങ്ങളാണ് എത്തിച്ചത്. അത് ബി.ജെ.പി ആസൂത്രണം ചെയ്തതാവാനും സാധ്യതയുണ്ട്. പുതിയ യന്ത്രങ്ങളുടെ വിശ്വാസ്യത ആരെങ്കിലും പരിശോധിച്ചിട്ടുണ്ടോയെന്നും അവര്‍ ചോദിച്ചു.
രക്തസാക്ഷിദിനമായി ആചരിച്ചുവരുന്ന അടുത്തമാസം 12ന് പ്രക്ഷോഭത്തിന് തുടക്കം കുറിക്കുമെന്ന് അവര്‍ അറിയിച്ചു. ബംഗാളില്‍ സി.പി.എം സര്‍ക്കാര്‍ ഭരണത്തിലിരിക്കെ 1993 ജൂലൈ 12ന് 13 യൂത്ത് കോണ്‍ഗ്രസ് പ്രവര്‍ത്തകരുടെ മരണത്തിനിടയാക്കിയ വെടിവയ്പ്പ് നടന്ന ദിവസമാണ് രക്തസാക്ഷിദിനമായി ആചരിച്ചുവരുന്നത്. തിരിച്ചറിയല്‍ കാര്‍ഡില്ലാതെ വോട്ട് ചെയ്യാന്‍ അനുവദിക്കരുതെന്നായിരുന്നു പ്രക്ഷോഭകരുടെ ഒരാവശ്യം. അതു പിന്നീട് അംഗീകരിക്കപ്പെടുകയും ചെയ്തു. തെരഞ്ഞെടുപ്പ് ക്രമക്കേട് ആരോപിച്ചാണ് 1991ല്‍ ബംഗാളില്‍ അന്ന് യൂത്ത് കോണ്‍ഗ്രസ് നേതാവായിരുന്ന മമതയുടെ നേതൃത്വത്തില്‍ പ്രക്ഷോഭം നടന്നത്.