വാഷിങ്ടണ്‍: റഷ്യയുടെ വിമാനവേധ മിസൈല്‍ പ്രതിരോധ സംവിധാനമായ എസ്-400 ഇന്ത്യ വാങ്ങുന്നതില്‍ നീരസം പ്രകടിപ്പിച്ച് യു.എസ് പ്രസിഡന്റ് ഡൊണാള്‍ഡ് ട്രംപ്. ഇത് ഇന്ത്യയുമായുള്ള സഹകരണം കുറയ്ക്കുമെന്നും റഷ്യയുമായുള്ള ആയുധ ഇടപാട് ഉപേക്ഷിക്കുകയാണെങ്കില്‍ നൂതന സാങ്കേതികവിദ്യകളും ഉപകരണങ്ങളും നല്‍കി ഇന്ത്യന്‍ പ്രതിരോധ സംവിധാനത്തെ സഹായിക്കാന്‍ അമേരിക്ക തയാറാണെന്നും ട്രംപ് വ്യക്തമാക്കി.
റഷ്യയുടെ വിമാനവേധ മിസൈല്‍ സംവിധാനം വാങ്ങുന്നതിന് 500 കോടി ഡോളറിന്റെ കരാറില്‍ ഇന്ത്യ കഴിഞ്ഞ വര്‍ഷം ഒക്ടോബറില്‍ ഒപ്പുവച്ചിരുന്നു. ലോകത്തിലെ ഏറ്റവും മികച്ച മിസൈല്‍ പ്രതിരോധ സംവിധാനമാണ് റഷ്യയുടെ എസ്-400. 2014ല്‍ ചൈന ഇത് സ്വന്തമാക്കിയിരുന്നു. കിര്‍ഗിസ്താനില്‍ നടന്ന ഷാങ്ഹായ് രാജ്യങ്ങളുടെ ഉച്ചകോടിയില്‍ റഷ്യന്‍ പ്രസിഡന്റ് വ്‌ളാദ്മിര്‍ പുടിനുമായി ഇന്ത്യന്‍ പ്രധാനമന്ത്രി നരേന്ദ്രമോദി ചര്‍ച്ച നടത്തുകയും അമേത്തിയില്‍ കലാഷ്‌നിക്കോവ് നിര്‍മാണം തുടങ്ങുന്നതില്‍ നന്ദി അറിയിക്കുകയും ചെയ്ത പശ്ചാത്തലത്തിലാണ് ട്രംപിന്റെ ഭീഷണി.
നേരത്തെ എസ്-400 ഇടപാട് ഉപേക്ഷിക്കുകയാണെങ്കില്‍ യു.എസിന്റെ എഫ്-35 യുദ്ധവിമാനങ്ങള്‍ ഇന്ത്യക്ക് നല്‍കാമെന്ന് യു.എസ് വാഗ്ദാനം നല്‍കിയിരുന്നു. ഇന്ത്യയുമൊന്നിച്ചാണ് മറ്റേതൊരു രാജ്യത്തെക്കാളും കൂടുതല്‍ യു.എസ് സമീപകാലത്ത് സൈനികാഭ്യാസങ്ങള്‍ നടത്തിയിട്ടുള്ളതെന്നും പ്രധാന പ്രതിരോധ പങ്കാളിയായാണ് ഇന്ത്യയെ ട്രംപ് ഭരണകൂടം കാണുന്നതെന്നും യു.എസ് സ്റ്റേറ്റ് ഡിപ്പാര്‍ട്ട്‌മെന്റിലെ മുതിര്‍ന്ന ഉദ്യോഗസ്ഥ ആലീസ് ജി വെല്‍സ് പറഞ്ഞു. പത്തു വര്‍ഷം മുന്‍പ് ഇതുപോലെ ആയുധങ്ങള്‍ ഇന്ത്യക്ക് നല്‍കുമെന്ന് യു.എസ് പറയുമായിരുന്നില്ല. 10 വര്‍ഷം കൊണ്ട് ഇന്ത്യ-യു.എസ് പ്രതിരോധ വ്യാപാരം 1800 കോടി കടന്നതായി അവര്‍ ചൂണ്ടിക്കാട്ടി. യു.എസുമായി സമ്പൂര്‍ണ സൈനിക സഹകരണത്തിനുള്ള കോംകാസ കരാറില്‍ ഇന്ത്യ ഒപ്പുവച്ചിട്ടുണ്ട്.