റിയാദ്: സഊദിയിൽ പ്രഖ്യാപിച്ച തൊഴിൽ നിയമ പരിഷ്കാരണങ്ങളുടെ ഭാഗമായുള്ള നാട്ടിൽ പോകാനുള്ള അനുമതിക്കായി വിദേശികൾക്ക് സ്വന്തം അബ്ഷിർ പോർട്ടൽ വഴി റീ എൻട്രി വിസ സ്വന്തമാക്കാമെന്ന് അധികൃതർ. എന്നാൽ,  തൊഴിലുടമക്ക് ഇത്  സംബന്ധമായ നോട്ടിഫിക്കേഷൻ ലഭിക്കുമെങ്കിലും ഇഷ്യു ചെയ്ത റി എൻട്രി വിസയും എക്സിറ്റും കാൻസൽ ചെയ്യാൻ തൊഴിലുടമക്ക് അനുവാദമുണ്ടാകില്ലെന്നതും ഏറെ  ശദ്ധേയമാണ്.

       റീ എൻട്രിയിൽ പോയി തിരിച്ചുവന്നില്ലെങ്കിൽ നിലവിലെ പ്രവേശന നിരോധനനിയമം ബാധകമാകും. റീ എൻട്രിയുടെ പണമടക്കുന്ന ഉത്തരവാദിത്വം തൊഴിലാളിയിൽ നിക്ഷിപ്തമായിരിക്കും. തൊഴിലിൽ തുടരാൻ താത്പര്യമില്ലെങ്കിൽ തൊഴിലാളിക്ക് സ്വന്തമായി എക്‌സിറ്റ് അടിച്ചുനാട്ടിലേക്ക് തിരിക്കാമെങ്കിലും തൊഴിൽ കരാർ കാലാവധി അവസാനിക്കുന്നതിന് മുമ്പാണെങ്കിൽ തൊഴിലുടമക്ക് നഷ്ടപരിഹാരം നൽകേണ്ടിവരുമെന്നും നിബന്ധനകളിൽ പറയുന്നു.

       ഇപ്പോഴത്തേത് പോലെ തന്നെ ട്രാഫിക് പിഴകളോ സർക്കാർ ഫീസുകളിലെ കുടിശ്ശികയോ ഉണ്ടെങ്കിൽ ഇവ അടച്ചു തീർത്തതിന് ശേഷമേ എക്സിറ്റ്, റീഎൻട്രി എന്നിവ നേടാൻ സാധിക്കൂ. എന്നാൽ, തൊഴിലാളി ഇഷ്യു ചെയ്ത റി എൻട്രി വിസ തൊഴിലുടമക്ക് കാൻസൽ ചെയ്യാൻ സാധിക്കില്ല. അതേസമയം, തൊഴിൽ കരാർ അവസാനിക്കുന്നതിന്  മുമ്പാണ്  ഫൈനൽ എക്സിറ്റ് ഇഷ്യു ചെയ്തതെങ്കിൽ കരാർ പ്രകാരമുള്ള നഷ്ട പരിഹാരം തൊഴിലുടമക്ക് നൽകാൻ തൊഴിലാളി ബാധ്യസ്ഥനാണ്.

പുതിയ പ്രഖ്യാപനത്തിലെ മറ്റു മേഖലകളിലെ നിബന്ധനകൾ ഇവയാണ് 

തൊഴിലുടമയുടെ അനുമതിയില്ലാതെ തൊഴിൽമാറ്റം അനുവദിക്കുന്ന സാഹചര്യങ്ങൾ

•  തൊഴിലാളി സഊദിയിൽ പ്രവേശിച്ച് മൂന്ന് മാസത്തിനുള്ളിൽ രേഖാമൂലം സാക്ഷ്യപ്പെടുത്തിയ തൊഴിൽ കരാർ ഉണ്ടാക്കിയിട്ടില്ലെങ്കിൽ

• തുടർച്ചയായ മൂന്ന് മാസം തൊഴിലാളിയുടെ വേതനം നൽകിയിട്ടില്ലെങ്കിൽ

• യാത്ര മൂലമോ, മരണം മൂലമോ, ജയിലിലായത് കൊണ്ടോ മറ്റു കാരണങ്ങൾ കൊണ്ടോ തൊഴിലുടമയുടെ അഭാവം ഉണ്ടായാൽ

• വർക്ക് പെർമിറ്റോ ഇഖാമയോ കാലാവധി കഴിയൽ

• തൊഴിലുടമയുടെ ബിനാമി ഇടപാടുകൾ റിപ്പോർട്ട് ചെയ്താലും തൊഴിൽ മാറ്റം സാധിക്കും. എന്നാൽ ഇതേ ബിനാമി ഇടപാടിൽ റിപ്പോർട്ട് ചെയ്യുന്ന വിദേശി പങ്കാളിയാകാൻ പാടില്ലെന്ന നിബന്ധയുണ്ട്.

• തൊഴിലുടമ മനുഷ്യക്കടത്ത് നടത്തിയതായി തെളിയൽ

• തൊഴിൽ കേസിൽ സമൻസ് ലഭിച്ചിട്ടും തൊഴിലുടമ രണ്ട് പ്രാവശ്യം ഹാജറാകാതിരിക്കൽ.

കൂടാതെ, നിലവിലെ തൊഴിലുടമ സ്‌പോൺസർഷിപ് മാറ്റത്തിന് അനുമതി നൽകിയാലും വിദേശികൾക്ക് സ്‌പോൺസർഷിപ് മാറ്റം സാധ്യമാകും.

സ്‌പോൺസർഷിപ് മാറ്റത്തിനുള്ള നിബന്ധനകൾ

• സഊദിയിലെത്തിയിട്ട് ഒരു വർഷമെങ്കിലും പൂർത്തിയാകൽ

• സ്പോൺസറും തൊഴിലാളിയും  ഒപ്പുവെച്ച ഇലക്ട്രോണിക് തൊഴിൽ കരാർ ഉണ്ടായിരിക്കൽ

• മന്ത്രാലയത്തിന്റെ ഖിവ വെബ്‌സൈറ്റിൽ തൊഴിൽ പരസ്യം ചെയ്യൽ

•  നിലവിലെ തൊഴിലുടമക്ക് സ്‌പോൺസർഷിപ് മാറ്റം സംബന്ധിച്ച് നോട്ടീസ് നൽകൽ 

സ്‌പോൺസർഷിപ് ഏറ്റെടുക്കുന്ന സ്ഥാപനങ്ങൾക്കുള്ള നിബന്ധനകൾ

• വേതനസുരക്ഷ നിയമം പാലിക്കൽ

• വിദേശത്ത് നിന്ന് തൊഴിലാളികളെ റിക്രൂട്ട് ചെയ്യാൻ വിസ ലഭിക്കാൻ യോഗ്യതയുണ്ടാകൽ

• മന്ത്രാലയത്തിന്റെ സ്വയം വിലയിരുത്തൽ പദ്ധതിയും ഇലക്ട്രോണിക് തൊഴിൽ കരാർ വ്യവസ്ഥയും നടപ്പാക്കൽ 

അതേസമയം, സഊദിയിലെത്തി ഒരു വർഷം പൂർത്തിയാകുന്നതിന് മുമ്പ് സ്‌പോൺസർഷിപ്പ് മാറണമെങ്കിൽ  സ്‌പോൺസറുടെ അനുമതി ആവശ്യമാണ്. നിലവിലെ ഫീസ് സംവിധാനമാണ് സ്‌പോൺസർഷിപ് മാറ്റത്തിന് തുടരുക. അടുത്ത വർഷം മാർച്ച് പതിനാല് മുതലാണ് സ്വകാര്യ മേഖലാ ജീവനക്കാർക്കായി ഇത് പ്രാബല്യത്തിൽ വരിക.

    എന്നാൽ, ഹൗസ് ഡ്രൈവർ, വേലക്കാരി, ഇടയൻ, തോട്ടം ജോലിക്കാരൻ, ഹാരിസ് എന്നീ പ്രൊഫഷനുകളിൽ പുതിയ പദ്ധതി പ്രകാരമുള്ള ആനുകൂല്യങ്ങൾ ലഭിക്കില്ല. ഇവർക്കായി സമാനമായ പ്രഖ്യാപനങ്ങൾ ഉടൻ ഉണ്ടായേക്കും.