എടപ്പാള്‍: കാലടി, വട്ടംകുളം പഞ്ചായത്തുകളെ ബന്ധിപ്പിക്കുന്നതും കാലടിയിലെ കണ്ടനകത്തുനിന്ന് ആരംഭിച്ച് ആനക്കരയില്‍ എത്തുന്നതുമായ റോഡില്‍ വ്യാപകമായ കൈയേറ്റം നടക്കുന്നതായി പരാതി. പൊതുമരാമത്ത് വകുപ്പിന്റെ ഉടമസ്ഥതയിലുള്ള ഈ റോഡില്‍ നിന്നു നിശ്ചിത അകലം പാലിക്കാതെ വീടുകളും കെട്ടിടങ്ങളും കിണറുകളും നിര്‍മിക്കുന്നത് വ്യാപകമായിരിക്കുകയാണ്.
ഇതുസംബന്ധിച്ച് കാലടി പഞ്ചായത്ത് അധികൃതര്‍ക്ക് ഒട്ടേറെ നിവേദനങ്ങള്‍ നല്‍കിയിട്ടും അന്വേഷണം നടത്തിയിട്ടില്ലെന്നു നാട്ടുകാര്‍ പരാതിപ്പെടുന്നു. കൈയേറ്റം വ്യാപകമാണെങ്കിലും ഇതുസംബന്ധിച്ച് കുറ്റിപ്പുറത്തെ പൊതുമരാമത്ത് വകുപ്പ് അധികൃതര്‍ക്കു വ്യക്തമായ വിവരങ്ങളില്ല. കൈയേറ്റം സംബന്ധിച്ച് കണ്ടണ്ടനകം സ്വദേശി പൊതുമരാമത്ത് വകുപ്പ് അധികൃതര്‍ക്ക് പരാതി നല്‍കിയെങ്കിലും വ്യക്തമായ മറുപടി ലഭിച്ചില്ല. കണ്ടണ്ടനകംആനക്കര റോഡിന്റെ യഥാര്‍ഥ വീതി രേഖപ്പെടുത്തിയ രേഖകളൊന്നും പൊതുമരാമത്ത് അസിസ്റ്റന്റ് എന്‍ജിനീയറുടെ ഓഫിസില്‍ ഇല്ലെന്ന മറുപടിയാണ് പരാതിക്കാരനു ലഭിച്ചത്.
പൊതുമരാമത്ത് വകുപ്പിന്റെ റോഡില്‍നിന്നു മൂന്നുമീറ്റര്‍ ദൂരം ഒഴിവാക്കി മാത്രമേ കെട്ടിടങ്ങളും വീടുകളും കിണറുകളും ഉള്‍പ്പെടെയുള്ള നിര്‍മാണം നടത്താന്‍ പാടുള്ളൂവെന്ന നിയമമുള്ളപ്പോള്‍ നിലവിലുള്ള റോഡിന്റെ വീതി എത്രയെന്ന രേഖപോലും ബന്ധപ്പെട്ട ഓഫിസുകളില്‍ ഇല്ലാത്ത അവസ്ഥയാണ്. ഈ സാഹചര്യത്തില്‍ വര്‍ഷങ്ങളായി ഈ റോഡിന്റെ വശങ്ങളില്‍ നടന്നിട്ടുള്ള കൈയേറ്റങ്ങള്‍ കണ്ടെണ്ടത്താന്‍ ഉദ്യോഗസ്ഥരും റവന്യു വകുപ്പും തയാറാകണമെന്ന് ആവശ്യം ഉയര്‍ന്നിട്ടുണ്ട്.