കല്‍പ്പറ്റ: നഗരത്തിലെ ട്രാഫിക് പരിഷ്‌കരണത്തില്‍ വലഞ്ഞ് യാത്രക്കാര്‍.
മേപ്പാടി, പിണങ്ങോട് ഭാഗങ്ങളില്‍ നിന്ന് കല്‍പ്പറ്റയിലെത്തുന്ന ബസ് യാത്രക്കാര്‍ക്കാണ് ടൗണില്‍ നടപ്പാക്കിയ ഗതാഗത പരിഷ്‌കരണം ദുരിതമാകുന്നത്. ട്രാഫിക് പരിഷ്‌കരണം നടപ്പാക്കുമ്പോള്‍ പൊതുയാത്രാ സംവിധാനങ്ങള്‍ ഉപയോഗപ്പെടുത്തുന്നവരുടെ സൗകര്യങ്ങള്‍ പരിഗണിക്കണമെന്നിരിക്കെ, കല്‍പ്പറ്റ നഗരസഭ ഇത് പരിഗണിക്കാതിരുന്നതാണ് യാത്രക്കാരെ വലക്കുന്നത്. നിലവില്‍ മേപ്പാടി ഭാഗത്ത് നിന്നെത്തുന്നവര്‍ക്ക് പുതിയ സ്റ്റാന്‍ഡിലോ പഴയ സ്റ്റാന്‍ഡിലോ മാത്രമാണ് ബസ് ഇറങ്ങാനാകുന്നത്.
നേരത്തെ ചുങ്കത്ത് സ്റ്റോപ് ഉണ്ടായിരുന്നെങ്കിലും പരിഷ്‌കരണത്തിന്റെ ഭാഗമായി ഇതൊഴുവാക്കുകയായിരുന്നു. ഇതോടെ മാര്‍ക്കറ്റ് ഭാഗത്തേക്കുള്ള യാത്രക്കാര്‍ വരെ സ്റ്റാന്‍ഡുകളിലിറങ്ങി നടക്കേണ്ട ഗതികേടാണുള്ളത്. അതേ സമയം, കല്‍പ്പറ്റയില്‍ നിന്ന് മേപ്പാടി ഭാഗത്തേക്കുള്ള ബസുകള്‍ക്ക് ചുങ്കത്ത് സ്റ്റോപും അനുവദിച്ചിട്ടുണ്ട്. പടിഞ്ഞാറത്തറ-പിണങ്ങോട് ഭാഗത്ത് നിന്നുമുള്ള യാത്രക്കാരും സ്‌റ്റോപ് ഒഴിവാക്കിയത് മൂലം വലഞ്ഞിരിക്കുകയാണ്. നേരത്തെ പിണങ്ങോട് ഭാഗത്ത് നിന്നെത്തുന്ന ബസുകള്‍ മാര്‍ക്കറ്റ് റോഡില്‍ ആളെയിറക്കിയാണ് സ്റ്റാന്‍ഡുകളിലേക്ക് പോയിരുന്നത്. എന്നാല്‍ പരിഷ്‌കരണത്തിന്റെ ഭാഗമായി ഈ സ്റ്റോപ്പും ഒഴിവാക്കി. ഇതോടെ മാര്‍ക്കറ്റ് ഭാഗത്തിറങ്ങേണ്ടവര്‍ പഴയ സ്റ്റാന്‍ഡില്‍ പോയി തിരിച്ചു വരവേ ചുങ്കത്ത് ഇറങ്ങി നടക്കേണ്ട സ്ഥിതിയാണ്. എന്നാല്‍ കല്‍പ്പറ്റയില്‍ നിന്ന് പിണങ്ങോട് ഭാഗത്തേക്ക് പോകുന്ന ബസുകള്‍ക്ക് മാര്‍ക്കറ്റ് റോഡില്‍ സ്‌റ്റോപ്പ് അനുവദിച്ചിട്ടുമുണ്ട്. പൊതുയാത്രാ സംവിധാനങ്ങളെ ഉപയോഗപ്പെടുത്തുന്നവരെ പരിഗണിക്കാതെ ടൗണിലെ ഗതാഗത കുരുക്ക് ഒഴിവാക്കാന്‍ സ്വന്തമായി വാഹനമുള്ളവരുടെ യാത്ര സുഗമമാക്കുക മാത്രമാണ് ഗതാഗത പരിഷ്‌കരണത്തിലൂടെ നഗരസഭ ചെയ്തതെന്ന ആരോപണം ശക്തമാകുകയാണ്. എന്നാല്‍ പരിഷ്‌കരണം നിലവില്‍വന്ന ദിനങ്ങലില്‍ ഗതാഗത കുരുക്കിന് അയവുണ്ടായിരുന്നെങ്കില്‍ ഇപ്പോള്‍ വീണ്ടും ഗതാഗതം പഴയപടിയായിട്ടുണ്ടെന്നും ആക്ഷേപമുണ്ട്. ബസ് യാത്രക്കാരുടെ സൗകര്യം കൂടി കണക്കിലെടുത്ത് ഗതാഗത പരിഷ്‌കരണത്തില്‍ മാറ്റം വരുത്തണമെന്ന ആവശ്യം ഇതോടെ ശക്തമാകുകയാണ്.