മണ്ണാര്‍ക്കാട്: വാഗ്ദാനങ്ങള്‍ നല്‍കി പണവും സ്വര്‍ണവും തട്ടിയെടുത്ത കേസില്‍ അറസ്റ്റിലായ പ്രതിയെ മണ്ണാര്‍ക്കാടെത്തിച്ച് തെളിവെടുപ്പ് നടത്തി. കൊല്ലം സ്വദേശി ബാബു എന്ന റഹീം ബാബു (52) വിനെയാണ് മണ്ണാര്‍ക്കാട് കൊണ്ടുവന്ന് തെളിവെടുപ്പ് നടത്തിയത്.
പണം തട്ടിപ്പ് കേസില്‍ കൊല്ലത്ത് അറസ്റ്റ് ചെയ്ത് ജയില്‍ ശിക്ഷ അനുഭവിക്കുന്ന ബാബുവിനെതിരേ മണ്ണാര്‍ക്കാടും സമാന രീതിയിലുളള കേസ് നിലവിലുണ്ട്. അമിത ലാഭം വാഗ്ദാനം ചെയ്ത് പണം തട്ടിയെടുത്തതായാണ് മണ്ണാര്‍ക്കാട് കേസ്. അരക്കുപറമ്പ് സ്വദേശി പുല്ലൂശന്‍ വീട്ടില്‍ മജീദിന്റെ പരാതിയിലാണ് മണ്ണാര്‍ക്കാട് കേസ് നിലവിലുളളത്. മജീദില്‍നിന്ന് 20000 രൂപയും, 23 പവന്‍ സ്വര്‍ണാഭരണവുമാണ് തട്ടിയെടുത്തത്. മൂന്ന് വര്‍ഷത്തിന് ശേഷമാണ് പ്രതിയെ സമാന കേസില്‍ കൊല്ലത്ത് അറസ്റ്റ് ചെയ്തതറിഞ്ഞ് മണ്ണാര്‍ക്കാട് പൊലിസ് കസ്റ്റഡിയില്‍ വാങ്ങിയത്. റഹീം തങ്ങളെന്ന പേരില്‍ മണ്ണാര്‍ക്കാട് മേഖലയില്‍ മന്ത്രവാദ ചികിത്സകളും നടത്തിയതായും ഇതിലൂടെയും വന്‍തുക തട്ടിയെടുത്തതായും പറയപ്പെടുന്നുണ്ട്. മാനഹാനി ഭയന്ന് ആരും ഇതുസംബന്ധിച്ച് പരാതി നല്‍കിയിട്ടില്ല.