പിടിയിലായത് ആലപ്പുഴ സ്വദേശികള്‍
തൃശൂര്‍: കള്ളനോട്ട് അടിച്ച് സംസ്ഥാനത്തിന്റെ വിവിധയിടങ്ങളില്‍ വിതരണം ചെയ്തിരുന്ന സഹോദരങ്ങള്‍ പിടിയില്‍. ആലപ്പുഴ വടുതല സ്വദേശികളും സഹോദരങ്ങളുമായ പള്ളിപ്പറമ്പില്‍ വീട്ടില്‍ ബെന്നി ബര്‍ണാഡ് (39), ജോണ്‍സണ്‍ ബര്‍ണാഡ്(31)എന്നിവരാണ് പിടിയിലായത്. ജില്ലയില്‍ വിവിധയിടങ്ങളില്‍ കടകളിലും വ്യാപാര സ്ഥാപനങ്ങളിലും രണ്ടായിരത്തിന്റെയും അഞ്ഞൂറിന്റെയും കള്ള നോട്ടുകള്‍ കണ്ടെത്തിയ സംഭവം അന്വേഷിച്ചപ്പോഴാണ് പ്രതികള്‍ കുടുങ്ങിയത്. 1,21,000 രൂപയുടെ കള്ളനോട്ടും വിദേശ നിര്‍മിത പ്രിന്ററും അനുബന്ധ ഉപകരണങ്ങളും ഇവരില്‍ നിന്ന് കണ്ടെടുത്തു.

ശക്തന്‍ സ്റ്റാന്‍ഡില്‍വച്ച് 18,000 രൂപയുടെ കള്ളനോട്ട് ഉള്‍പ്പെടെ ബെന്നി ബര്‍ണാഡാണ് ആദ്യം പിടിയിലായത്. ചോദ്യം ചെയ്യലില്‍ സ്വന്തം സഹോദരനാണ് കള്ളനോട്ട് അടിക്കുന്നതെന്നും താന്‍ വിതരണക്കാരനാണെന്നും പ്രതി സമ്മതിക്കുകയായിരുന്നു. ഇവരുടെ ആലപ്പുഴ വടുതലയിലെ വീട് റെയ്ഡ് ചെയ്തപ്പോഴാണ് നോട്ടടിക്കാനുപയോഗിച്ച പ്രിന്റര്‍ ഉള്‍പ്പെടെയുള്ളവ പിടികൂടിയത്. വിതരണത്തിനായി തയ്യാറാക്കി വച്ചിരുന്ന പണവും കണ്ടെടുത്തു. കൊലപാതക കേസിലെ പ്രതികൂടിയാണ് അറസ്റ്റിലായ ബെന്നി ബര്‍ണാഡ്. ജോണ്‍സണ്‍ ഓട്ടോ ഡ്രൈവറാണ്. സ്‌കൂളിലേക്ക് കുട്ടികളെ കൊണ്ടുപോയിരുന്ന ഇയാള്‍ക്ക് നാട്ടില്‍ നല്ല പ്രതിച്ഛായ ആണുള്ളതെന്ന് പൊലിസ് പറഞ്ഞു. എറണാകുളം, ആലപ്പുഴ, കൊല്ലം, കോട്ടയം, തൃശൂര്‍, പാലക്കാട്, മലപ്പുറം ജില്ലകളില്‍ ലക്ഷക്കണക്കിന് രൂപയുടെ കള്ളനോട്ടുകളാണ് ഇവര്‍ വിതരണം ചെയ്തിട്ടുള്ളത്. ഇവരില്‍ നിന്ന് കള്ളനോട്ടുകള്‍ വാങ്ങിയവരെപ്പറ്റിയും പൊലിസ് അന്വേഷണം ആരംഭിച്ചിട്ടുണ്ട്.