സുല്‍ത്താന്‍ ബത്തേരി: സ്‌കൂളിന് മുന്നിലെ ദേശീയപാതയില്‍ വര്‍ഷങ്ങളായി മാഞ്ഞുകിടക്കുന്ന സീബ്രാലൈന്‍ പുനസ്ഥാപിച്ച് സ്‌കൂള്‍ പി.ടി.എ. അപകടം പതിവായി ഉണ്ടാവുന്ന അസംപ്ഷന്‍ സ്‌കൂളിന് മുന്നിലാണ് ദേശീയപാതയില്‍ സീബ്രാലൈന്‍ പുനസ്ഥാപിച്ചത്. 2000ത്തിലേറെ വിദ്യാര്‍ഥികള്‍ പഠനം നടത്തുന്ന അസംപ്ഷന്‍ സ്‌കൂളിന് മുന്നിലെ ദേശീയപാതയിലെ സീബ്രാലൈന്‍ മാഞ്ഞ് പോയിട്ട് വര്‍ഷങ്ങളായി. ഇത് കാരണം വിദ്യാര്‍ഥികള്‍ രാവിലെയും വൈകിട്ടും റോഡ് മുറിച്ച് കടക്കുമ്പോള്‍ അപകടം പതിവായിരുന്നു. ഇത് ശ്രദ്ധയില്‍പെട്ട പി.ടി.എ മുന്‍കൈയ്യെടുത്താണ് സീബ്രാലൈന്‍ പുനസ്ഥാപിച്ചത്. സ്‌കൂളിന് പുറമെ ആശുപത്രി, രണ്ട് ആരാധനാലയങ്ങള്‍ എന്നിവ പ്രവര്‍ത്തിക്കുന്ന ഈ ഭാഗത്ത് സീബ്രാലൈന്‍ ഇല്ലാതായതോടെ അപകടങ്ങള്‍ തുടര്‍ക്കഥയായി മാറി. ഒരാഴ്ചമുമ്പ് സ്‌കൂള്‍ വിദ്യാര്‍ഥിക്ക് ഇവിടെ വെച്ച് വാഹനം തട്ടി പരുക്കേറ്റിരുന്നു. വര്‍ഷങ്ങല്‍ക്ക് മുമ്പ് ഈ ഭാഗത്ത് റോഡ് മുറിച്ച് കടക്കവേ ഒരു വിദ്യാര്‍ഥി വാഹനം തട്ടി മരണപെടുകയും ചെയ്തിരുന്നു. എന്നാല്‍ ഈ ഭാഗത്ത് അപകടം ഒഴിവാക്കാന്‍ നടപടികള്‍ ഒന്നും തന്നെ ഉണ്ടായില്ല. ഈ സാഹചര്യത്തിലാണ് സ്‌കൂള്‍ പി.ടി.എ തന്നെ മുന്‍കൈയ്യെടുത്ത് റോഡില്‍ സീബ്രാലൈന്‍ പുനസ്ഥാപിച്ചത്.