ലിബ്‌റെവില്ലെ: ആഫ്രിക്കന്‍ മേഖലയില്‍ നിന്ന് ഫിഫ അണ്ടര്‍ 17 ലോകകപ്പിന് യോഗ്യത നേടുന്ന ആദ്യ ടീമായി ഘാന. അണ്ടര്‍ 17 ആഫ്രിക്കന്‍ നേഷന്‍സ് കപ്പിന്റെ സെമിയിലെത്തിയാണ് ഘാന യോഗ്യത ഉറപ്പാക്കിയത്. മറ്റ് മേഖലകളില്‍ നിന്നുള്ള ടീമുകളുടെ ചിത്രം വ്യക്തമായി. നാല് ടീമുകള്‍ക്കാണ് ആഫ്രിക്കയില്‍ നിന്ന് അവസരം. ഘാന യോഗ്യരായതോടെ ബാക്കി മൂന്ന് സ്ഥാനത്തേക്ക് ആര് എന്നാണ് ഇനിയറിയാനുള്ളത്.
ആതിഥേയ രാജ്യമെന്ന നിലയില്‍ ഇന്ത്യ യോഗ്യരായപ്പോള്‍ ഇറാന്‍, ഇറാഖ്, ജപ്പാന്‍, ഉത്തര കൊറിയ ടീമുകളാണ് ഏഷ്യയില്‍ നിന്ന്. കോണ്‍കാകാഫ് മേഖലയില്‍ നിന്ന് കോസ്റ്റ റിക്ക, ഹോണ്ടുറാസ്, മെക്‌സിക്കോ, യു.എസ്.എ ടീമുകളാണ് മത്സരിക്കുന്നത്. ലാറ്റിനമേരിക്കയില്‍ നിന്ന് ബ്രസീല്‍, ചിലി, കൊളംബിയ, പരാഗ്വെ ടീമുകള്‍. അര്‍ജന്റീനയുടെ അസാന്നിധ്യമാണ് ഇതില്‍ ശ്രദ്ധേയം.
ഓഷ്യാനിയയില്‍ നിന്ന് ന്യൂസിലന്‍ഡ്, ന്യൂ കലെഡോണിയ. യൂറോപ്പില്‍ നിന്ന് ഇംഗ്ലണ്ട്, ഫ്രാന്‍സ്, ജര്‍മനി, സ്‌പെയിന്‍, തുര്‍ക്കി ടീമുകള്‍. ഈ മേഖലയില്‍ നിന്ന് ഇറ്റലിയുടെ അസാന്നിധ്യം ശ്രദ്ധേയം.