തിരുവനന്തപുരം: അന്തര്‍സംസ്ഥാന സ്വകാര്യ ബസ് സമരം തുടരുന്ന സാഹചര്യത്തില്‍ യാത്രക്കാരുടെ ബുദ്ധിമുട്ട് പരിഹരിക്കാന്‍ അധിക സര്‍വിസുകളുമായി കെ.എസ്.ആര്‍.ടി.സി. ദിവസേന കെ.എസ്.ആര്‍.ടി.സി നടത്തിവരുന്ന 49 ബംഗ്ലൂരു ഷെഡ്യൂളുകള്‍ക്ക് പുറമേ തിങ്കളാഴ്ച വരെ പ്രത്യേക അധിക വാരാന്ത്യ, വാരാദ്യ സര്‍വിസുകളാണ് നടത്തുക.

ആലപ്പുഴ, ചങ്ങനാശേരി, കോട്ടയം, എറണാകുളം, പയ്യന്നൂര്‍, കട്ടപ്പന, കണ്ണൂര്‍,കോഴിക്കോട്, കാഞ്ഞങ്ങാട്, തൃശൂര്‍, തിരുവനന്തപുരം, വടകര, തൊട്ടില്‍പ്പാലം, തലശേരി, സുല്‍ത്താന്‍ബത്തേരി എന്നിവിടങ്ങളില്‍നിന്നു ബംഗളൂരുവിലേക്കും തിരിച്ചും ഈ ദിവസങ്ങളില്‍ പ്രത്യേക സര്‍വിസ് ഉണ്ടാകും.
ബംഗളൂരുവില്‍ നിന്നും തിരിച്ച് കേരളത്തിന്റെ വിവിധ സ്ഥലങ്ങളിലേക്ക് ഏതുസമയവും യാത്രക്കാര്‍ ആവശ്യപ്പെടുന്ന മുറയ്ക്ക് സര്‍വിസുകള്‍ നടത്താനായി ജീവനക്കാര്‍ സഹിതം അഞ്ച് ബസുകള്‍ ബംഗ്ലൂരില്‍ കെ.എസ്.ആര്‍.ടി.സി സജ്ജമാക്കിയിട്ടുമുണ്ട്. ഇത്തരത്തില്‍ പ്രത്യേക സാഹചര്യത്തില്‍ അധികമായി ഓപ്പറേറ്റ് ചെയ്യുന്ന സര്‍വിസുകള്‍ ഉള്‍പ്പെടെയുള്ള എല്ലാ സര്‍വിസുകളിലും യാത്രക്കാര്‍ക്ക് ഓണ്‍ലൈനായി സീറ്റുകള്‍ റിസര്‍വ് ചെയ്യാനുള്ള സൗകര്യവും ഒരുക്കിയിട്ടുണ്ടെന്ന് ബന്ധപ്പെട്ടവര്‍ അറിയിച്ചു.