ശ്രീനഗര്‍: ജമ്മു കശ്മീരിലെ നൗഗാമില്‍ നുഴഞ്ഞുകയറ്റത്തിനു ശ്രമിച്ച രണ്ടു തീവ്രവാദികളെ സൈന്യം വധിച്ചു. നുഴഞ്ഞുകയറ്റശ്രമം തടയുന്നതിനിടെയുണ്ടായ ഏറ്റുമുട്ടലില്‍ രണ്ട് സൈനികര്‍ കൊല്ലപ്പെട്ടു.

കുപ്‌വാര ജില്ലയിലെ നൗഗാം സെക്ടറിലാണ് നിയന്ത്രണ രേഖ മുറിച്ചുകടക്കാന്‍ ശ്രമിച്ചത്. ഇതു തടയുന്നതിനിടെയാണ് രണ്ടു സൈനികര്‍ കൊല്ലപ്പെട്ടത്.

പിന്നീട് ബങ്കുസ് താഴ്‌വരയില്‍ ബഡി ബഹകിലാണ് രണ്ടാമതൊരു നുഴഞ്ഞുകയറ്റ ശ്രമമുണ്ടാവുന്നത്. ഇവിടെ സൈനികര്‍ ശക്തമായ ഇടപെടല്‍ നടത്തുകയും രണ്ടു തീവ്രവാദികളെ വധിക്കുകയുമായിരുന്നു.

പ്രദേശത്തെ നുഴഞ്ഞുകയറ്റശ്രമം തടയുന്നതിന്റെ ഭാഗമായി ഏര്‍പ്പെടുത്തിയ സുരക്ഷാ സംവിധാനങ്ങള്‍ നേരിട്ട് കാണാന്‍ കഴിഞ്ഞദിവസം പ്രതിരോധമന്ത്രി അരുണ്‍ ജയ്റ്റ്‌ലി സ്ഥലത്തെത്തിയിരുന്നു.