കാസര്‍കോട്: ശിശുക്ഷേമസമിതി ക്രഷുകളുടെ പ്രതിസന്ധി പരിഹരിക്കണമെന്ന്  ജില്ലാ ശിശുക്ഷേമസമിതി വാര്‍ഷിക യോഗം ആവശ്യപ്പെട്ടു. എ.ഡി.എം എന്‍. ദേവിദാസിന്റെ അധ്യക്ഷതയില്‍  കലക്ടറേറ്റില്‍ ചേര്‍ന്ന  യോഗത്തിലാണ് ക്രഷുകളുടെ പ്രതിസന്ധികള്‍ ചര്‍ച്ചചെയ്തത്. ജില്ലയിലെ 13 ക്രഷുകളിലായി 150 ഓളം കുട്ടികളാണ് പഠനം നടത്തുന്നത്. പിന്നാക്ക പ്രദേശങ്ങളില്‍ പ്രവര്‍ത്തിക്കുന്ന ക്രഷുകളിലെ ജീവനക്കാരുടെ വേതന കുടിശ്ശിക ഉടന്‍ ലഭ്യമാക്കണമെന്ന്  യോഗം ആവശ്യപ്പെട്ടു.  
കുട്ടികളുടെ  ക്ഷേമപ്രവര്‍ത്തനങ്ങള്‍ ഊര്‍ജിതമാക്കും. കുടുംബങ്ങളിലും വിദ്യാലയങ്ങളിലും പൊതുസ്ഥലങ്ങളിലും കുട്ടികളും അവരുടെ രക്ഷിതാക്കളും അഭിമുഖീകരിക്കുന്ന  മാനസിക സമ്മര്‍ദ്ദങ്ങള്‍ ലഘൂകരിക്കുന്നതിനായി സംസ്ഥാന ശിശുസംരക്ഷണ സമിതി രൂപികരിച്ച തണല്‍ചൈല്‍ഡ് ഹേല്‍പ്പ് ലൈന്‍ പദ്ധതിയിലേക്ക് 1517 എന്ന ടോള്‍ ഫ്രീ നമ്പറില്‍ വിളിക്കാവുതാണ്.
വിദ്യാര്‍ഥികള്‍ക്കിടയിലും രക്ഷിതാക്കള്‍ക്കിടയിലും ഈ ടോള്‍ഫ്രീ നമ്പര്‍ പ്രചരിപ്പിക്കും. യോഗത്തില്‍ സെക്രട്ടറി മധു മുതിയക്കാല്‍ റിപ്പോര്‍ട്ട് അവതരിപ്പിച്ചു.  ട്രഷറര്‍ എം. ലക്ഷ്മി ബജറ്റ് അവതരിപ്പിച്ചു.  കാറഡുക്ക ബ്ലോക്ക്  പഞ്ചായത്ത് പ്രസിഡന്റ് ഓമനാ രാമചന്ദ്രന്‍, സാമൂഹ്യനീതി ഓഫിസര്‍ ഡീനാ ഭരതന്‍, ശിശു സംരക്ഷണ ഓഫിസര്‍ പി. ബിജു, ഡി.ഡി.ഇ ഡോ. ഗിരീഷ് ചോലയില്‍, തണല്‍ കോഓര്‍ഡിനേറ്റര്‍ സി. വൈശാഖ്, അജയന്‍ പനയാല്‍, എം.പി.വി ജാനകി, കെ.വി രമേശന്‍ എന്നിവര്‍ സംസാരിച്ചു.