ആയഞ്ചേരി (കോഴിക്കോട്): ബിരുദാനന്തര ബിരുദ കോഴ്‌സുകള്‍ക്ക് സീറ്റ് വര്‍ധിപ്പിക്കാന്‍ സര്‍ക്കാര്‍ അനുമതി നല്‍കിയിട്ടും സംസ്ഥാനത്തെ പല ഗവ. ആര്‍ട്‌സ് ആന്‍ഡ് സയന്‍സ് കോളജുകളും ഇത് നടപ്പിലാക്കാത്തത് വിദ്യാര്‍ഥികളെ ആശങ്കയിലാക്കുന്നു. ഉപരിപഠനത്തിന് അര്‍ഹത നേടിയ വിദ്യാര്‍ഥികളുടെ അവസരമാണ് ഇതുമൂലം നഷ്ടമാകുന്നത്.

ബഹുഭൂരിപക്ഷം കോളജുകളിലും ബിരുദാനന്തര ബിരുദത്തിന് സയന്‍സ് വിഷയങ്ങള്‍ക്ക് പന്ത്രണ്ടും ആര്‍ട്‌സ് വിഷയങ്ങള്‍ക്ക് പതിനഞ്ചും സീറ്റാണുള്ളത്. ഇത് യഥാക്രമം പരമാവധി പതിനാറും ഇരുപതും ആക്കാനാണ് ഉന്നത വിദ്യാഭ്യാസ സെക്രട്ടറി ഉഷ ടൈറ്റസ് ഈ മാസം 21ന് പുറപ്പെടുവിച്ച ഉത്തരവില്‍ പറയുന്നത്. യു.ജി.സി സ്‌കെയില്‍ ശമ്പളം പറ്റുന്ന നാല് അധ്യാപകരും ആനുപാതികമായി ഓഫിസ് ജീവനക്കാരും ലാബ് അസിസ്റ്റന്റുമാരുമാണ് ഒരു പി.ജി കോഴ്‌സിന് ഉണ്ടാവുക. ഇതില്‍ മാറ്റം വരുത്താതെയുള്ള സീറ്റ് വര്‍ധനവാണ് സര്‍ക്കാര്‍ വിഭാവനം ചെയ്യുന്നത്.

അതിന് പ്രത്യേകം ക്ലാസ് മുറിയോ അധ്യാപകരോ ആവശ്യമില്ല, ഇതിനാല്‍ തന്നെ യാതൊരു സാമ്പത്തിക ബാധ്യതയും ഉണ്ടാകുകയുമില്ല. പി.ജി പ്രവേശനവുമായി ബന്ധപ്പെട്ട സര്‍വകലാശാലകളുടെ നടപടി ക്രമങ്ങള്‍ അവസാന ഘട്ടത്തിലെത്തി നില്‍ക്കെ സര്‍ക്കാര്‍ കോളജുകള്‍ കാണിക്കുന്ന നിരുത്തരവാദം പ്രതിഷേധത്തിനും കാരണമായിട്ടുണ്ട്.

ക്ലാസ് മുറിയില്‍ ഇരിപ്പിടവും സയന്‍സ് വിഷയങ്ങളാണെങ്കില്‍ ലാബില്‍ ചില ഉപകരണങ്ങളും ഒരുക്കിയാല്‍ മതിയാകും. ഇതിനു പി.ടി.എ ഫണ്ടും പ്രിന്‍സിപ്പല്‍ ഡെപ്പോസിറ്റും മതിയാകും. അതല്ലെങ്കില്‍ എം.എല്‍.എയുടെ പ്രാദേശിക വികസന നിധിയില്‍ നിന്നും പണം കണ്ടെത്താനും പ്രയാസമുണ്ടാകില്ല. നടപടിക്രമങ്ങള്‍ ഇത്ര ലളിതമായിട്ടും കോളജ് അധികൃതര്‍ സീറ്റ് വര്‍ധിപ്പിക്കാന്‍ തയാറാകുന്നില്ല. വിദ്യാര്‍ഥി സംഘടനകളൊന്നും ഇക്കാര്യത്തില്‍ പ്രതികരിക്കാത്തതും ദുരൂഹമാണ്.
അതേസമയം, പുതിയ ഉത്തരവിന്റെ വെളിച്ചത്തില്‍ എയ്ഡഡ്, അണ്‍ എയ്ഡഡ് കോളജുകള്‍ സീറ്റ് കൂടാനുള്ള എല്ലാ ഒരുക്കങ്ങളും നടത്തുകയും ചെയ്യുന്നുണ്ട്.