കൊച്ചി: ഫ്രാങ്കോ മുളയ്ക്കലിന്റെ ജാമ്യാപേക്ഷ വിശദമായ വാദംകേള്‍ക്കാനായി ഹൈക്കോടതി വ്യാഴാഴ്ചത്തേക്ക് മാറ്റി. ജാമ്യാപേക്ഷയില്‍ സര്‍ക്കാരിനോട് കോടതി നിലപാട് തേടി. തന്റെ അറസ്റ്റ് നിയമവിരുദ്ധമാണെന്നും താന്‍ നിരപരാധിയാണെന്നുമാണ് ജാമ്യാപേക്ഷയില്‍ പറയുന്നത്. മുന്‍കൂര്‍ ജാമ്യാപേക്ഷ കോടതിയുടെ പരിഗണനയിലിരിക്കെ അറസ്റ്റ് ചെയ്തത് തെറ്റാണെന്ന് ഫ്രാങ്കോയുടെ അഭിഭാഷകന്‍ കോടതിയെ അറിയിച്ചു. എന്നാല്‍ അറസ്റ്റ് തടയണമെന്ന ആവശ്യം ഹരജിക്കാരന്‍ ഉന്നയിച്ചിരുന്നില്ലെന്ന് കോടതി ചൂണ്ടിക്കാട്ടി. തുടര്‍ന്ന് വിശദമായ വാദംകേള്‍ക്കാന്‍ കേസ് വ്യാഴാഴ്ചത്തേക്ക് മാറ്റുകയായിരുന്നു. കന്യാസ്ത്രീക്കെതിരേ നിരവധി പരാതികള്‍ മുന്‍പ് ഉയര്‍ന്നിട്ടുണ്ട്. ഇതില്‍ നടപടിക്ക് താന്‍ ശുപാര്‍ശ ചെയ്തതിലുള്ള വൈരാഗ്യത്താലാണ് തനിക്കെതിരേ പരാതി നല്‍കിയതെന്നും ഹരജിയില്‍ പറയുന്നു. ഹാജരാകാന്‍ നോട്ടിസ് നല്‍കിയ തിയതി തന്നെ എത്തി ചോദ്യംചെയ്യലിന് ഹാജരായി. അന്വേഷണവുമായി താന്‍ സഹകരിക്കുന്നുണ്ട്. തനിക്കെതിരേ മറ്റ് ക്രിമിനല്‍ കേസുകള്‍ ഇല്ലെന്നും ജാമ്യം അനുവദിക്കണമെന്നും ഹരജിയില്‍ ആവശ്യപ്പെട്ടിട്ടുണ്ട്. കന്യാസ്ത്രീയും കുടുംബവും കേരളത്തില്‍ കാലുകുത്താന്‍ അനുവദിക്കില്ലെന്ന് ഭീഷണിപ്പെടുത്തിയിരുന്നുവെന്നും ഹരജിയില്‍ ചൂണ്ടിക്കാട്ടുന്നു. ഇക്കാര്യത്തിന് പരാതിപ്പെട്ട ശേഷമാണ് തനിക്കെതിരേ പരാതി ഉയര്‍ന്നതെന്നാണ് ജാമ്യാപേക്ഷയില്‍ പറയുന്നത്.
ഫ്രാങ്കോക്കെതിരേ സമര്‍പ്പിച്ച പൊതുതാല്‍പര്യ ഹര്‍ജികള്‍ ചീഫ് ജസ്റ്റിസ് അധ്യക്ഷനായ ഡിവിഷന്‍ ബഞ്ച് തീര്‍പ്പാക്കി. ഈ അവസരത്തില്‍ ഈ ഹര്‍ജികള്‍ ആവശ്യമില്ലെന്ന് കോടതി വ്യക്തമാക്കി. പൊലിസിനെ സ്വതന്ത്രമായി അന്വേഷിക്കാന്‍ വിടണമെന്നും മറ്റേതെങ്കിലും താല്‍പര്യങ്ങള്‍ ഈ ഹര്‍ജികള്‍ക്കു പുറകിലുണ്ടോയെന്നും കോടതി ചോദിച്ചു. സി.ബി.ഐ അന്വേഷണം നടത്തണമെന്നാവശ്യപ്പെട്ട് സമര്‍പ്പിച്ച ഹര്‍ജി പിന്നീട് പിന്‍വലിച്ചു.