ചവറ: നാടിന്റെ നന്മകളുടെ ഉറപ്പുള്ള നട്ടെല്ലാണ് ഗ്രന്ഥശാലകളെന്ന് എം. മുകേഷ് എം.എല്‍.എ പറഞ്ഞു. പൊന്മന പ്രോഗ്രസീവ് ഗ്രന്ഥശാലയുടെ 58ാം വാര്‍ഷികാഘോഷം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. അറിവുകളെ വീണ്ടെടുക്കാനുള്ള പൊതു ഇടങ്ങളാണ് ഗ്രാമീണ ഗ്രന്ഥശാലകള്‍. ഒരു നാടിന്റെ സംസ്‌കാരത്തെ തിരയുമ്പോള്‍ ആദ്യം ചെന്നെത്തുന്നത് ഗ്രന്ഥശാലകളിലാണ്. ആ നല്ല നാളുകളെ വീണ്ടെടുക്കാന്‍ ഗ്രന്ഥശാലാ പ്രവര്‍ത്തകര്‍ക്ക് കഴിയണമെന്ന് മുകേഷ് പറഞ്ഞു.
ഗ്രന്ഥശാല പ്രസിഡന്റ് പൊന്മന നിശാന്ത് അധ്യക്ഷനായി. സിനിമാ സംവിധായകന്‍ അനില്‍ വി. നാഗേന്ദ്രന്‍ മുഖ്യപ്രഭാഷണം നടത്തി. വിവിധ മേഖലകളില്‍ കഴിവു തെളിയിച്ച വി.വിജയകുമാര്‍, ജയകൃഷ്ണന്‍, എം.എസ് ജയന്‍, അനീഷ, പി സുരേഷ്, കെ.കുട്ടപ്പന്‍, സുഭാഷ് ചന്ദ്രന്‍ എന്നിവരെ കലാ സംവിധായകന്‍ അജിത് പ്ലാക്കാട്ട് ആദരിച്ചു. സജിത് രഞ്ച്, മൈനാഗപ്പള്ളി ശ്രീരംഗന്‍, ഇടക്കുളങ്ങര ഗോപന്‍, ജസീനാറഹീം, റ്റി. വിശ്വനാഥന്‍, കെ.ഹൃദയകുമാര്‍, ദയാനന്ദന്‍ എന്നിവര്‍ സംസാരിച്ചു. വിദ്യാര്‍ഥികള്‍ക്കായി ക്വിസ് മത്സരം, ചിത്രപ്രദര്‍ശനം, കളരിപ്പയറ്റ് പ്രദര്‍ശനം എന്നിവ നടന്നു.