റിയാദ്: സഊദിയിൽ തൊഴിലാളികളുടെ വർക്ക് പെർമിറ്റ് പുതുക്കണമെങ്കിൽ താമസ സ്ഥലം രജിസ്റ്റർ ചെയ്യണമെന്ന് നിർദേശം. തൊഴിലാളികളുടെ താമസ സ്ഥലങ്ങൾ പാർപ്പിടകാര്യ മന്ത്രാലയത്തിനു കീഴിലെ ഈജാർ നെറ്റ്‌വർക്കിൽ രജിസ്റ്റർ ചെയ്യണമെന്ന് മാനവശേഷി, സാമൂഹിക വികസന മന്ത്രാലയം കമ്പനികളോട് ആവശ്യപ്പട്ടിട്ടുണ്ട്. ഇത് സംബന്ധിച്ച് മന്ത്രാലയം തൊഴിലുടമകൾക്ക് സന്ദേശങ്ങളും നൽകിക്കഴിഞ്ഞു. ഈജാർ സംവിധാനത്തിൽ നിങ്ങളുടെ കീഴിലെ തൊഴിലാളികളുടെ പാർപ്പിട സ്ഥലം രജിസ്റ്റർ ചെയ്യണമെന്നും രജിസ്‌ട്രേഷൻ പൂർത്തീകരിക്കാതെ തൊഴിലാളികളുടെ വർക്ക് പെർമിറ്റ് പുതുക്കുകയില്ലെന്നും അറിയിപ്പിൽ വ്യക്തമാക്കുന്നുണ്ട്. ഇതിനു പിന്നാലെ കമ്പനികൾ തങ്ങളുടെ കീഴിൽ പുറത്ത് താമസിക്ക്ന്ന തൊഴിലാളികളോട് താമസ സ്ഥലങ്ങൾ രജിസ്റ്റർ ചെയ്യാൻ ആവശ്യപ്പെട്ടു തുടങ്ങി.

[caption id="attachment_908663" align="alignnone" width="626"] മന്ത്രാലയം കമ്പനികൾക്ക് നൽകിയ സന്ദേശം[/caption]

     ചെറുകിട, ഇടത്തരം സ്ഥാപനങ്ങൾ അടക്കം സ്വകാര്യ മേഖലയിലെ മുഴുവൻ സ്ഥാപനങ്ങളും തങ്ങൾക്കു കീഴിലെ തൊഴിലാളികളുടെ താമസ സ്ഥലങ്ങൾ പാർപ്പിടകാര്യ മന്ത്രാലയത്തിനു കീഴിലെ ഈജാർ നെറ്റ്‌വർക്കിൽ രജിസ്റ്റർ ചെയ്യണമെന്നാണ് മന്ത്രാലയം നിർദേശം നൽകിയത്. സ്വകാര്യ സ്ഥാപനങ്ങളിലെ ജീവനക്കാർക്കുള്ള, വ്യക്തിഗതവും കൂട്ടായുള്ളതുമായ താമസ സ്ഥലങ്ങളുമായി ബന്ധപ്പെട്ട വിവരങ്ങൾ സ്ഥാപനങ്ങൾക്കുള്ള ഈജാർ നെറ്റ്‌വർക്കിലെ ഗ്രൂപ്പ് ഹൗസിംഗ് പ്ലാറ്റ്‌ഫോം വെളിപ്പെടുത്തും. സ്ഥാപനങ്ങൾ പാലിക്കേണ്ട വ്യക്തവും നിർണിതവുമായ മാനദണ്ഡങ്ങൾക്ക് അനുസൃതമായി തൊഴിലാളികളുടെ ജോലി സാഹചര്യങ്ങൾക്ക് നിരക്കുന്ന അനുയോജ്യമായ താമസ സൗകര്യങ്ങൾ ലഭ്യമാണെന്ന് ഉറപ്പു വരുത്തുകയും ഇതിന്റെ അടിസ്ഥാനത്തിൽ സ്ഥാപനങ്ങളെ വിലയിരുത്തുകയും ചെയ്യും.

     കൂട്ടായ പാർപ്പിടത്തിനുള്ള താമസ സ്ഥലങ്ങൾ വ്യവസ്ഥാപിതമാക്കൽ, ബന്ധപ്പെട്ട വകുപ്പുകളുടെ പരിശോധനാ ആവശ്യങ്ങൾക്കും മറ്റും പാർപ്പിട സ്ഥലങ്ങൾ നിർണയിക്കൽ, തൊഴിലാളികൾക്ക് നൽകുന്ന സേവനങ്ങളുടെ നിലവാരം ഉയർത്താൻ സ്ഥാപനങ്ങളെ പ്രാപ്തമാക്കൽ എന്നിവ അടക്കമുള്ള പൊതുവായ ദേശീയ ലക്ഷ്യങ്ങൾ കൈവരിക്കാനും പ്ലാറ്റ്‌ഫോം ഉപകരിക്കുമെന്നാണ് അധികൃതർ കരുതുന്നത്.