തിരുവനന്തപുരം: യൂറോപ്പ് സന്ദര്‍ശനത്തില്‍ മുഖ്യമന്ത്രിക്ക് സുരക്ഷ ഒരുക്കിയതിന് സ്വകാര്യ ഏജന്‍സിക്ക് പണം അനുവദിക്കാന്‍ ആഭ്യന്തര വകുപ്പ് അഡിഷണല്‍ ചീഫ് സെക്രട്ടറി ടി.കെ ജോസ് ഡി.ജി.പി ലോക്‌നാഥ് ബെഹ്‌റക്ക് നിര്‍ദേശം നല്‍കി.
കഴിഞ്ഞ മെയ് 8 മുതല്‍ 19 വരെ നടത്തിയ യൂറോപ്പ്യന്‍ സന്ദര്‍ശനത്തില്‍ സുരക്ഷ ഒരുക്കിയതിനാണ് പണം നല്‍കുന്നത്.

മുഖ്യമന്ത്രിക്ക് ഇസഡ് പ്ലസ് കാറ്റഗറി സുരക്ഷയാണുള്ളത്. സുരക്ഷാഭീഷണി ഉള്ളതിനാല്‍ സ്വകാര്യ ഏജന്‍സിയുടെ സുരക്ഷ നല്‍കണമെന്ന് ഡി.ജി.പി ലോക്‌നാഥ് ബെഹ്‌റ നേരത്തേ ആവശ്യപ്പെട്ടിരുന്നു.
ഇതേതുടര്‍ന്ന് ആഭ്യന്തരവകുപ്പ് അഡിഷണല്‍ ചീഫ് സെക്രട്ടറി സുരക്ഷ ഒരുക്കാന്‍ ഡി.ജി.പിക്ക് നിര്‍ദേശം നല്‍കി. മുഖ്യമന്ത്രിക്ക് സ്വകാര്യ സുരക്ഷ ഒരുക്കണമെന്ന് വിദേശകാര്യ മന്ത്രാലയത്തിലെ ജോയിന്റ് സെക്രട്ടറിയോടും നെതര്‍ലന്‍ഡ്‌സിലെ ഇന്ത്യന്‍ എംബസിയോടുമാണ് ഡി.ജി.പി ഇ മെയില്‍ മുഖേന ആവശ്യപ്പെട്ടത്. ഇതനുസരിച്ച് നെതര്‍ലന്‍ഡ്‌സിലും സ്വിറ്റ്‌സര്‍ലന്‍ഡിലും പാരിസിലും ലണ്ടനിലും എംബസികള്‍ സ്വകാര്യ ഏജന്‍സികളുടെ സുരക്ഷ ഏര്‍പ്പെടുത്തി.

അതതു രാജ്യങ്ങളിലെ എംബസിയുമായി ചര്‍ച്ച ചെയ്ത ശേഷം സുരക്ഷയ്ക്കായി ചെലവായ തുക നല്‍കാനാണ് ടി.കെ ജോസ് ഡി.ജി.പിക്ക് നിര്‍ദേശം നല്‍കിയിരിക്കുന്നത്.
ഉത്തരവില്‍ തുക വ്യക്തമാക്കിയിട്ടില്ലെങ്കിലും പൊലിസിന്റെ ഏതെങ്കിലും ഫണ്ടില്‍ നിന്ന് അനുവദിക്കാനാണ് ആഭ്യന്തരവകുപ്പിന്റെ നിര്‍ദേശം.