ന്യൂഡല്‍ഹി: അന്താരാഷ്ട്ര ക്രിക്കറ്റില്‍നിന്ന് വിരമിക്കുന്നതായി പ്രഖ്യാപിച്ച് ഇന്ത്യന്‍ താരം അമ്പാട്ടി റായിഡു. ലോകകപ്പില്‍ കളിക്കാന്‍ അവസരം ലഭിക്കാത്തതിനെ തുടര്‍ന്നാണ് താരത്തിന്റെ വിരമിക്കല്‍ തീരുമാനം. ക്രിക്കറ്റിന്റെ മുഴുവന്‍ ഫോര്‍മാറ്റില്‍നിന്നും വിരമിക്കുന്നതായാണ് താരം അറിയിച്ചത്. ഇന്ത്യന്‍ ലോകകപ്പ് ടീമില്‍ ബാറ്റിങ് ഓര്‍ഡറില്‍ നാലാമനായി അവകാശ വാദം ഉന്നയിച്ചെങ്കിലും ലോകകപ്പ് ടീമില്‍ താരത്തെ ഉള്‍പ്പെടുത്തിയരുന്നില്ല.റിസര്‍വ് ലിസ്റ്റില്‍ മാത്രം പരിഗണിച്ച റായിഡുവിനു പകരം ടീമിലെത്തിയത് വിജയ് ശങ്കര്‍ . ശങ്കറിനെ ഉള്‍പ്പെടുത്തിയ ബി.സി.സി.ഐയുടെ തീരുമാനത്തെ ത്രീഡി പരാമര്‍ശത്തിലൂടെ ട്രോളിയ റാഡിഡുവിന്റെ ട്വീറ്റ് ഏറെ വിവാദം സൃഷ്ടിച്ചിരുന്നു. റിസര്‍വ് ലിസ്റ്റ് താരങ്ങളായ ഋഷഭ് പന്തിനും ദിനേഷ് കാര്‍ത്തിക്കിനും കളിക്കാന്‍ അവസരം ലഭിച്ചെങ്കിലും റായിഡു തഴയപ്പെട്ടു. വിജയ് ശങ്കര്‍ പരുക്കേറ്റു പുറത്തായപ്പോള്‍ റായിഡുവിനെ പരിഗണിക്കുമെന്നു കരുതിയെങ്കിലും മായങ്ക് അഗര്‍വാളിനെയാണ് ടീമില്‍ ഉള്‍പ്പെടുത്തിയത്. ഇന്ത്യക്കു വേണ്ടി 55 ഏകദിനങ്ങളില്‍ നിന്നായി 1694 റണ്‍സ് നേടിയ റായിഡുവിന്റെ പേരില്‍ മുന്ന് സെഞ്ചുറികളും 10 അര്‍ധസെഞ്ചുറികളുമുണ്ട്. ഇന്ത്യക്ക് വേണ്ടി ആറു ടി20യും റായിഡു കളിച്ചിട്ടുണ്ട്. ഐ.പി.എല്ലില്‍ മുംബൈ ഇന്ത്യന്‍സിനും ചെന്നൈക്കും വേണ്ടി കളിച്ച റായിഡു നേരത്തെ ഏകദിന ക്രിക്കറ്റില്‍ കൂടുതല്‍ ശ്രദ്ധ കേന്ദ്രീകരിക്കാനായി നേരത്തെ ഫസ്റ്റ് ക്ലാസ് ക്രിക്കറ്റില്‍നിന്ന് വിരമിച്ചിരുന്നു.