വടക്കാഞ്ചേരി: ഓട്ടുപാറ ബസ് സ്റ്റാന്‍ഡ് നവീകരണ പ്രവര്‍ത്തനങ്ങള്‍ക്ക് തുടക്കമായി. ബൈപാസ് റോഡ്, ബസ് സ്റ്റാന്‍ഡിലേക്ക് ബസുകള്‍ പ്ര വേശിക്കുന്ന സ്ലാബുകള്‍ മാറ്റി സ്ഥാപിക്കല്‍ എന്നീ പ്രവര്‍ത്തനങ്ങളാണ് ആരംഭിച്ചത്.
ഇത് മൂലം ഇന്നലെ മുതല്‍ ഈ മാസം 31 വരെ സ്റ്റാന്‍ഡിലേക്ക് ബസുകള്‍ പ്രവേശിക്കുന്നത് നിരോധിച്ചു. വടക്കാഞ്ചേരി പൊലിസാണ് ഇത് സംബന്ധിച്ച ഉത്തരവ് ഇറക്കിയത്. ചേലക്കര, ഷൊര്‍ണൂര്‍, കുന്നംകുളം, കുണ്ടുകാട് എന്നീ ഭാഗങ്ങളില്‍ നിന്ന് വരുന്ന വാഹനങ്ങള്‍ ഓട്ടുപാറ സിറ്റി ഹോട്ടലിന് മുന്നില്‍ നിര്‍ത്തിയാണ് ആളുകളെ ഇറക്കുകയും, കയറ്റുകയും ചെയ്യുന്നത്.
തൃശൂരില്‍ നിന്ന് ഷൊര്‍ണൂര്‍, ചേലക്കര, കുന്നംകുളം ഭാഗത്തേക്ക്് പോകുന്ന ബസുകള്‍ ന്യൂകാസിലിന് മുന്നില്‍ നിര്‍ത്തി ആളുകളെ കയറ്റുകയും, ഇറക്കുകയും ചെയ്യും. കുന്നംകുളത്ത് നിന്ന് വരുന്ന ബസുകള്‍ ഓട്ടുപാറയിലെ പഴയ ബ്രൈറ്റ് ഹോട്ടലിന് മുന്നില്‍ നിര്‍ത്തിയാണ് ആളുകളെ കയറ്റുകയും, ഇറക്കുകയും ചെയ്യുന്നത്. ഓട്ടുപാറയില്‍ നിന്ന് സര്‍വീസ് ആരംഭിക്കുന്ന ബസുകളുടെ പാര്‍ക്കിങ് താല്‍കാലികമായി വാഴാനി റോഡിലേക്ക് മാറ്റി. ഇവിടെ ട്രിപ്പുകള്‍  അവസാനിപ്പിക്കുകയും ചെയ്യണം.  ഓട്ടുപാറ കുന്നം കുളം റോഡില്‍ അനധികൃതമായി പാര്‍ക്ക് ചെയ്യുന്ന ചരക്ക് ലോറികളുടെ പാര്‍ക്കിങ് കര്‍ശനമായി നിരോധിച്ചതായും പൊലിസ് അറിയിച്ചു.