തിരുവനന്തപുരം: ഗോത്രജീവിക പദ്ധതി പ്രകാരം 53 സ്വയംസഹായ സംഘങ്ങള്‍ രൂപീകരിച്ച് 1,170 പേര്‍ക്ക് തൊഴില്‍ ലഭ്യമാക്കിയെന്ന് മന്ത്രി എ.കെ ബാലന്‍. ലൈഫ് മിഷന്‍ ഉള്‍പ്പെടെയുള്ള ഭവന നിര്‍മാണ പ്രവര്‍ത്തനങ്ങള്‍ ഈ സംഘങ്ങള്‍ വഴിയാണ് നടപ്പാക്കുന്നത്. ഗോത്രബന്ധു പദ്ധതി പ്രകാരം 267 പട്ടികവര്‍ഗക്കാരെ മെന്റര്‍ ടീച്ചര്‍മാരായി വയനാട്ടിലും അട്ടപ്പാടിയിലും നിയമിച്ചു.
ഈ പദ്ധതി കണ്ണൂര്‍, കോഴിക്കോട്, മലപ്പുറം, പാലക്കാട് ജില്ലകളിലേക്കും വ്യാപിപ്പിക്കുന്നതിന് നടപടി സ്വീകരിച്ചു വരികയാണെന്ന് ഡി.കെ മുരളിയുടെ സബ്മിഷന് മറുപടിയായി മന്ത്രി പറഞ്ഞു. എല്‍.ഡി.എഫ് സര്‍ക്കാര്‍ അധികാരത്തില്‍ വന്നതിനു ശേഷം 2,729 പട്ടികവര്‍ഗക്കാര്‍ക്ക് താല്‍ക്കാലികമായി നിയമനം നല്‍കിയിട്ടുണ്ടെന്നും മന്ത്രി പറഞ്ഞു.