തിരുവനന്തപുരം: കെ.എസ്.എഫ്.ഇയിലെ വിജിലന്‍സ് പരിശോധനയോട് പ്രതികരിച്ച് ധനമന്ത്രി തോമസ് ഐസക്. വിജിലന്‍സ് പരിശോധന നടത്തുന്നതില്‍ ആരും എതിരല്ലെന്നും കെ.എസ്.എഫ്.ഇയെ താറടിക്കാന്‍ രാഷ്ട്രീയ ശത്രുക്കള്‍ക്ക് അവസരം ഉണ്ടാക്കുന്നത് ആവരുത് നടപടിയെന്നും ധനമന്ത്രി പറഞ്ഞു.

കേരളസര്‍ക്കാര്‍ പറയുന്നത് പോലയേ കേരളത്തിലെ വിജിലന്‍സ് പ്രവര്‍ത്തിക്കുകയുള്ളൂ, അതുകൊണ്ട് പ്രതിപക്ഷ നേതാവോ വി മുരളീധരനോ ഇപ്പോള്‍ ഞങ്ങള്‍ക്കെന്തെങ്കിലും കിട്ടുമെന്ന് പറഞ്ഞിരിക്കേണ്ടെന്നും അദ്ദേഹം പറഞ്ഞു.

കെ.എസ്.എഫ്.ഇയുടെ വിശ്വാസ്ത്യത നഷ്ടപ്പെടുത്തുന്ന തരത്തിലാണ് എതിരാളികള്‍ റെയ്ഡിനെ ഉപയോഗിക്കുന്നത്. കെ.എസ്.എഫ്.ഇ തകര്‍ന്നാല്‍ ലാഭം സ്വകാര്യസ്ഥാപനങ്ങള്‍ക്കും രാഷ്ട്രീയ എതിരാളികള്‍ക്കുമാണ്. വിജിലന്‍സ് അന്വേഷണം നടത്തുന്നത് സര്‍ക്കാര്‍ അറിയണമെന്നില്ല. അന്വേഷണ ഏജന്‍സികള്‍ക്ക് അതിനുള്ള സ്വയംഭരണ അവകാശമുണ്ട്. അന്വേഷണത്തിന്റെ റിപ്പോര്‍ട്ട് വന്നതിനുശേഷം സര്‍ക്കാര്‍ ഉചിതമായ തീരുമാനമെടുക്കും.

വിജിലന്‍സ് പരിശോധനകള്‍ പലതും നേരത്തെ സി.എ.ജി പറഞ്ഞതുതന്നെയാണ്. ഏകീകൃതമായ രീതിയില്‍ വാര്‍ത്തകള്‍ വരുന്നുണ്ട്. അത് അന്വേഷിക്കുമെന്നും തോമസ് ഐസക് പറഞ്ഞു.