കാബൂള്‍: താലിബാന്‍ നടത്തിയ ചാവേര്‍ കാര്‍ബോംബ് സ്‌ഫോടനത്തില്‍ സുരക്ഷാ ജീവനക്കാരും കുട്ടികളും ഉള്‍പ്പെടെ 12പേര്‍ മരിച്ചു. 150ല്‍ അധികം പേര്‍ക്ക് പരുക്കേറ്റു. ദോഹയില്‍ അഫ്ഗാനിലെ സമാധാന ശ്രമങ്ങള്‍ക്കായുള്ള യോഗം നടക്കുന്നതിനിടെയാണ് സ്‌ഫോടനം നടന്നതെന്നത് സംഭവത്തിന്റെ ഗൗരവം വര്‍ധിപ്പിക്കുന്നു.
ഗസ്‌നിയിലെ ഇന്റലിജന്‍സ് ഡിപാര്‍ട്ട്‌മെന്റിന് കോംപൗണ്ടിലാണ് സ്‌ഫോടനം നടന്നതെന്ന് പ്രവിശ്യാ കൗണ്‍സില്‍ അംഗം ഹസന്‍ റാസ യൂസഫി പറഞ്ഞു. മരിച്ചവരില്‍ എട്ട് പേര്‍ സുരക്ഷാ ഉദ്യോഗസ്ഥരും നാല് പേര്‍ സമീപത്തെ സ്‌കൂളിലെ വിദ്യാര്‍ഥികളുമാണ്. പരുക്കേറ്റവരില്‍ കൂടുതലും വിദ്യാര്‍ഥികളാണ്. സ്‌ഫോടനത്തില്‍ കെട്ടിടങ്ങളിലെ ചില്ല് പൊട്ടിത്തെറിച്ചാണ് ഭൂരിഭാഗം ആളുകള്‍ക്കും പരുക്കേറ്റത്.
സ്‌ഫോടനത്തിന്റെ ഉത്തരവാദിത്വം ഏറ്റെടുക്കുന്നതായും ഗസ്‌നിയിലെ ഇന്റലിജന്‍സ് സര്‍വീസ് സംവിധാനത്തെയാണ് തങ്ങള്‍ ലക്ഷ്യമിട്ടിരുന്നതെന്നും താലിബാന്‍ വക്താവ് സബീഹുല്ല മുജാഹിദ് അവകാശപ്പെട്ടു.