തിരുവനന്തപുരം: ക്ഷേമപെന്‍ഷന്‍ അനുവദിക്കുന്നതിന് പുതിയ മാനദണ്ഡങ്ങള്‍ ഏര്‍പ്പെടുത്തിക്കൊണ്ടുള്ള ധനവകുപ്പിന്റെ സര്‍ക്കുലര്‍ പിന്‍വലിച്ചത് കടുത്ത പ്രതിഷേധത്തെ തുടര്‍ന്ന്.

വെള്ളിയാഴ്ച ഇറങ്ങിയ സര്‍ക്കുലര്‍ ശനിയാഴ്ച രാത്രിയോടെയാണ് പിന്‍വലിച്ചത്. ധനകാര്യവകുപ്പ് ജോ.സെക്രട്ടറി ബി. പ്രതീപ്കുമാര്‍ ഇറക്കിയ സര്‍ക്കുലര്‍ പുറത്തുവന്നതോടെ സി.പി.എം നിയന്ത്രണത്തിലുള്ള തദ്ദേശ ഭരണ പ്രതിനിധികള്‍ ഇത് നേതൃത്വത്തിന്റെ ശ്രദ്ധയില്‍പ്പെടുത്തി. തുടര്‍ന്ന് പാര്‍ട്ടി പ്രവര്‍ത്തകര്‍ക്കിടയില്‍ വ്യാപക അമര്‍ഷത്തിന് കാരണമായ സര്‍ക്കുലര്‍ പിന്‍വലിക്കണമെന്ന് ധനമന്ത്രിയോട് നേതൃത്വം ആവശ്യപ്പെടുകയായിരുന്നു. എന്നാല്‍, തന്റെ അറിവോടെയല്ല സര്‍ക്കുലര്‍ ഇറക്കിയതെന്നാണ് മന്ത്രി നല്‍കിയ വിശദീകരണം. പെന്‍ഷന് പുതിയ മാനദണ്ഡങ്ങള്‍ ഏര്‍പ്പെടുത്തിയിട്ടില്ലെന്നും മന്ത്രി വ്യക്തമാക്കി. ഇതോടെ രാത്രി തന്നെ സര്‍ക്കുലര്‍ റദ്ദാക്കാന്‍ മന്ത്രി ബന്ധപ്പെട്ട ഉദ്യോഗസ്ഥര്‍ക്ക് നിര്‍ദേശം നല്‍കുകയായിരുന്നു.
അര്‍ഹതാ മാനദണ്ഡങ്ങള്‍ സംബന്ധിച്ച് കഴിഞ്ഞ വര്‍ഷം ഇറക്കിയ ഉത്തരവിന് വിരുദ്ധമായുള്ള കാര്യങ്ങളാണ് സര്‍ക്കുലറില്‍ ഉണ്ടായിരുന്നത്. അപേക്ഷകന്റെ ഭൗതിക സാഹചര്യങ്ങള്‍ വിലയിരുത്തുന്നതിനായുള്ള പുതിയ നിര്‍ദേശങ്ങളാണ് സര്‍ക്കുലറിനെതിരേ എതിര്‍പ്പ് വിളിച്ചുവരുത്തിയത്. അപേക്ഷകന്‍ താമസിക്കുന്ന വീടിന്റെ വലുപ്പം, കുടുംബത്തിലെ അംഗങ്ങളുടെ ജോലി, വരുമാനം, കുടുംബാംഗങ്ങളുടെ കൈവശഭൂമി എന്നിവയ്‌ക്കൊപ്പം വീട്ടില്‍ ആധുനിക വീട്ടുപകരണങ്ങളായ എ.സി, വാഷിങ് മെഷിന്‍ എന്നിവയുണ്ടോ, കുടുംബാംഗങ്ങള്‍ എ.സി വാഹനം ഉപയോഗിക്കുന്നുണ്ടോ എന്നിവ പരിശോധിക്കണമെന്ന് സര്‍ക്കുലറില്‍ വ്യക്തമാക്കിയിരുന്നു.