പെരിന്തല്‍മണ്ണ: കവുങ്ങില്‍ നിന്നു വീണ് ഗുരുതരമായി പരുക്കേറ്റ ആദിവാസി യുവാവിന് ആയുര്‍വേദ ചികിത്സയിലൂടെ സുഖപ്രാപ്തി. താഴെക്കോട് പഞ്ചായത്തിലെ പാണമ്പി ഇടിഞ്ഞാടി കോളനിയിലെ കുമാരന്റെ മകന്‍ രാജന്‍(46) ആണ് മൂന്ന് മാസത്തോളം നീണ്ട ചികിത്സയിലൂടെ ജീവിതത്തിലേക്ക് തിരിച്ചെത്തിയത്. പെരിന്തല്‍മണ്ണ ഗവ. ആയുര്‍വേദ ആശുപത്രിയിലായിരുന്നു ചികിത്സ.
തെങ്ങുകയറ്റ തൊഴിലാളിയായ രാജന് നാലുമാസം മുന്‍പ് കവുങ്ങില്‍ നിന്ന് വീണ് നട്ടെല്ലിനും കഴുത്തിലും പരുക്കേറ്റിരുന്നു. നട്ടെല്ലില്‍ മുകള്‍ഭാഗത്ത് ക്ഷതമേറ്റു. വേദന മൂലം അനങ്ങാനാകാത്ത അവസ്ഥയായിരുന്നു. കോഴിക്കോട് മെഡിക്കല്‍ കോളജിലും പെരിന്തല്‍മണ്ണ ജില്ലാ ആശുപത്രിയിലും ചികിത്സ തേടി.പിന്നീട് ആയുര്‍വേദ ആശുപത്രിയിലേക്ക് മാറ്റി.
സ്വന്തമായി എഴുന്നേല്‍ക്കാന്‍ പോലും കഴിയാതിരുന്ന രാജന്‍ ചികിത്സക്ക് ശേഷം എഴുന്നേറ്റു നടക്കുകയും സ്വന്തം അത്യാവശ്യ കാര്യങ്ങള്‍ ചെയ്യുന്നുണ്ട്. ഭാര്യ ജാനകിയാണ് മുഴുവന്‍ സമയവും പരിചരണത്തിനുള്ളത്. നാലുമക്കളും പെരിന്തല്‍മണ്ണയിലെ സായ് സ്‌നേഹതീരത്തിലെ അന്തേവാസികളാണ്.
ഗവ. ആയുര്‍വേദ ആശുപത്രിയിലെ ഡോ. എ. മനോജ്കുമാര്‍, ഡോ. മുഹമ്മദ് സാലിം, ഡോ. ഇല്‍മുന്നിസ്സ എന്നിവരാണ് ചികിത്സക്ക് നേതൃത്വം നല്‍കിയത്. ആശുപത്രിയില്‍ നിന്നും പോകുന്നതോടെ പുറമ്പോക്കില്‍ പ്ലാസ്റ്റിക് ഷീറ്റ് വലിച്ചുകെട്ടിയ കൂരയിലേക്കാണ് രാജന്‍ മടങ്ങേണ്ടത്. ജോലിക്കും മറ്റും പെട്ടെന്ന് പോകാന്‍കഴിയാത്ത രാജന് സ്വന്തമായി ഒരു നല്ല വീട് എന്നത് ഇപ്പോഴും സ്വപ്നമാണ്.