മാഡ്രിഡ്: 16 കാരനായ ബ്രസീലിയന്‍ യുവ താരം വിന്‍സിയസ് ജൂനിയറിനെ സ്വന്തം പാളയത്തിലെത്തിച്ച് സ്പാനിഷ് ചാംപ്യന്‍മാരായ റയല്‍ മാഡ്രിഡ്. ഏതാണ്ട് 333 കോടി രൂപയ്ക്കാണ് ബ്രസീലിയന്‍ അത്ഭുത ബാലന്‍ ഫ്‌ളെമംഗോയില്‍ നിന്ന് റയലിലേക്ക് കൂട് മാറുന്നത്. അതേസമയം താരത്തെ കൈമാറാനുള്ള കരാര്‍ ഇരു ടീമുകളും ഒപ്പുവച്ചെങ്കിലും 2018 ജൂലൈയില്‍ മാത്രമാണ് ഇത് നിലവില്‍ വരിക. ബ്രസീലിയന്‍ ടീമുമായി 2019 വരെ താരത്തിന് കരാര്‍ ബാക്കിയുള്ളതിനാലാണ് ഈ ഉടമ്പടി. അതേസമയം അതിന് മുന്‍പ് ഫ്‌ളെമംഗോ അനുവാദം നല്‍കിയാല്‍ റയലിന്റെ കുപ്പായത്തിലിറങ്ങാനും താരത്തിന് അവസരമൊരുങ്ങും.
ബ്രസീലിയന്‍ ലീഗിലെ രണ്ടാമത്തെ വലിയ താര കൈമാറ്റമാണ് ഇപ്പോള്‍ നടന്നിരിക്കുന്നത്. നേരത്തെ സാന്റോസില്‍ നിന്ന് നെയ്മറിനെ ബാഴ്‌സലോണ സ്വന്തമാക്കിയതാണ് ഒന്നാം സ്ഥാനത്ത്. വിന്‍സിയസിനായി ബാഴ്‌സലോണയും രംഗത്തുണ്ടായിരുന്നെങ്കിലും ചിരവൈരികളെ പിന്തള്ളിയാണ് റയല്‍ ബ്രസീലിയന്‍ കൗമാരക്കാരനെ സാന്റിയാഗോ ബെര്‍ണാബുവിലേക്ക് കൊണ്ടുവരുന്നത്.